امیتابھ بچن بھارتی ٹیم کی غلطیوں پر پردہ ڈالنے لگے

?️ 7 نومبر 2021

ممبئی (سچ خبریں) بھارتی ٹیم کی جانب سے آئی سی سی مینز ٹی ٹوئنٹی ورلڈ کپ کی شروعات میں ناقص کارکردگی کا مظاہرہ کرنے کے باوجود بھی بالی ووڈ اداکار امیتابھ بچن بھارتی کرکٹ ٹیم کی غلطیوں پر پردہ ڈالنے لگے،بھارتی کرکٹ ٹیم نے ٹورنامنٹ میں اب تک کا سب سے زیادہ اسکور کیا ہے۔

ٹی ٹوئنٹی ورلڈ کپ میں آج ایک اہم گروپ میچ کھیلا جائے گا جس میں بھارت کھیل تو نہیں رہا لیکن اس کی قسمت افغانستان کے ہاتھ میں ہے، اگر آج افغانستان نیوزی لینڈ سے جیت گیا تو بھارت سیمی فائنل میں جاسکے گا لہٰذا آج پورا بھارت افغان ٹیم کی فتح کے لیے دُعاگو ہے۔

اس حوالے سے امیتابھ بچن بھی خاموش نہ رہے اور مائیکرو بلاگنگ سائٹ ٹوئٹر پر بھارتی شائقین کے لیے خصوصی پیغام جاری کردیا۔امیتابھ بچن نے اپنے ٹوئٹ میں کہا کہ ’ آئی سی سی ٹی ٹوئنٹی ورلڈ کپ میں افغانستان اور نیوزی لینڈ کے درمیان کھیلے جانے والے میچ کے نتائج سے قبل بھارتی کرکٹ ٹیم کی حالیہ پرفارمنس پر نظر ڈالیں۔‘

بالی ووڈ اداکار نے کہا کہ ’بھارتی کرکٹ ٹیم نے ٹورنامنٹ میں اب تک کا سب سے زیادہ اسکور کیا ہے۔‘اُنہوں نے کہا کہ ’کے ایل راہول نے ٹی ٹوئنٹی ورلڈ کپ میں تیز ترین 50 رنز بنائے۔‘امیتابھ بچن نے کہا کہ ’ہم نے مخالف ٹیم کو ریکارڈ 6 سے زائد اوورز میں شکست دی۔‘

واضح رہے کہ ٹی ٹوئنٹی ورلڈ کپ میں بھارت سیمی فائنل میں پہنچے گا یا نہیں اس کا فیصلہ افغانستان کے ہاتھوں میں آگیا ہے۔گروپ 2 کے میچ میں آج اگر افغانستان کی ٹیم نیوزی لینڈ سے جیت جاتی ہے اور بھارت کا رن ریٹ بہتر ہوا تو بھارت سیمی فائنل میں پہنچ جائے گا۔اگر میچ میں نیوزی لینڈ جیت گیا تو بھارت کے سیمی فائنل میں جانے کے خواب چکنا چور ہو جائیں گے۔