گورنر پنجاب کی اٹک میں کھلی کچہری، شہریوں کے مسائل سنے

?️ 24 اگست 2025

اٹک (سچ خبریں) گورنر پنجاب سردار سلیم حیدر خان نے پنجاب کے ضلع اٹک کے علاقے فتح جنگ میں کھلی کچہری کا انعقاد کیا۔

کھلی کچہری میں لوگوں کی بڑی تعداد میں شریک ہوئی ، سردار سلیم حیدر نے شہریوں سے مصافحہ کیا اور ن کے مسائل سنے۔ اس موقع پر گفتگو کرتے ہوئے گورنر پنجاب کا کہنا تھا کہ پیپلزپارٹی عہدوں سے نہیں بلکہ پاکستان سے پاکستانی عوام سے پیار کرتی ہے، لوگوں سے ملنا ان کے مسائل سننا اور عوام میں رہنا صرف پیپلزپارٹی کا شیوا ہیں۔

انہوں نے کہا کہ فیلڈ مارشل عاصم منیر نے بھارت کو شکست دے کر قوم میں پاکستان سے محبت کا نیا جذبہ پیدا کر دیا ہے، ہمارے سپہ سالار فیلڈ مارشل عاصم منیر کا نام پاکستان کی تاریخ میں سنہری حروف میں لکھا جا رہا ہے اور ہمیشہ لکھا جائے گا۔

سردار سلیم حیدر خان کا کہنا تھا کہ کھلی کچہری میں آئے غریب لوگ بھی پاک فوج کے سربراہ کے معترف ہیں،جب تک اس عہدے پر فائز ہوں، غریب آدمی کے ساتھ زیادتی نہیں ہونے دوں گا، اگر گورنر ہاؤس میں موجود ہوں اور کوئی گیٹ پر آجائے تو یہ ممکن نہیں کہ مجھے ملے بغیر چلا جائے۔

گورنر پنجاب نے مزید کہا کہ پیپلزپارٹی واحد جماعت ہے جو اقتدار میں ہو یا نہ ہو عوام میں موجود رہتی ہے،میرے کارکن میرے جیالے میرا اثاثہ ہیں، انشاءاللہ اگلی حکومت عوامی مینڈیٹ سے پیپلزپارٹی کی ہو گی، میں گورنر بعد ہوں اور پیپلزپارٹی کا جیالا پہلے ہوں۔