گرینڈ ہیلتھ الائنس کا پنجاب بھر کے ہسپتالوں کی ایمرجنسی بند کرنے کا اعلان

?️ 28 اپریل 2025

لاہور: (سچ خبریں) گرینڈ ہیلتھ الائنس نے پنجاب بھر کے ہسپتالوں کی ایمرجنسی بند کرنے کا اعلان کردیا، سرکاری ہسپتالوں کی نجکاری کیخلاف گرینڈ ہیلتھ الائنس کا احتجاج جاری، مظاہرین مال روڈ سے تمام رکاوٹیں عبور کرتے ہوئے وزیراعلیٰ ہاﺅس کے باہر پہنچ گئے اور نعرے بازی شروع کر دی، پولیس کا مظاہرین پر تشدد ،پولیس نے مظاہرین کی گرفتاریاں شروع کردیں ،تفصیلات کے مطابق گرینڈ ہیلتھ الائنس کے مظاہرین پولیس کے منع کرنے کے باوجود رکاوٹیں عبور کرتے ہوئے وزیراعلیٰ ہاﺅس کے باہر پہنچ گئے جہاں انہوں نے دھرنا دیدیا۔

پولیس نے احتجاج کرنے والے مظاہرین کو قیدیوں کی وین میں بیٹھا کرلے جانا شروع کردیا۔ مظاہرین نے قیدیوں کی وین کے شیشے بھی توڑ دئیے اور وین کے آگے نعرے بازی بھی کی۔

گرینڈ ہیلتھ الائنس نے وزیراعلیٰ ہاﺅس کے باہر سے اپنے ساتھیوں کی گرفتاریوں کیخلاف بطور ہسپتالوں کی ان ڈورز بندکردیں جبکہ سرکاری ہسپتالوں کی ایمرجنسی بھی بندکرنے کا اعلان کیا۔

گرینڈ ہیلتھ الائنس کا کہنا ہے کہ پولیس نے نہتے پر امن مظاہرین پر لاٹھی چارج کیا۔ پریس کانفرنس کے بعد ایمرجنسی بند کرنے کا اعلان کیا جائے گا۔دوسری جانب پولیس کا کہنا ہے کہ مظاہرین عورتوں کو ڈھال بنا کر پولیس پر تشدد کررہے ہیں۔ احتجاجی مظاہرین قینچی، سرنجیں اور دیگر آلات سے پولیس پر حملہ آور ہو رہے ہیں۔ ذاتی اور سیاسی ایجنڈا لئے چند لوگ سیکورٹی صورتحال خراب کر رہے ہیں۔

پولیس ترجمان کے مطابق پولیس مظاہرین کےساتھ تحمل سے پیش آرہی ہے۔ پولیس مظاہرین کو ہائی سیکورٹی زون میں جانے سے روکنے کی کوشش کر رہی ہے۔ پولیس کو تشدد سے مکمل گریز کرنے کے احکامات دئیے گئے ہیں۔ترجمان پولیس کا مزید کہنا ہے کہ پی ایس ایل ٹیمیں اور غیر ملکی کھلاڑی چند قدم کے فاصلے پر رہائش پذیر ہیں۔مظاہرین کو پہلے ہی آگاہ کر دیا گیا تھا ۔

اس کے ساتھ ساتھ ہمسایہ ملک سے کشیدگی کے پیش نظر سیکورٹی خدشات میں بھی اضافہ کیا گیا ہے۔سرکاری ہسپتالوں کی نجکاری کیخلاف گرینڈ ہیلتھ الائنس کی اپیل پر لاہور کے سرکاری ہسپتالوں میں طبی عملے کی ہڑتال آج نویں روز بھی جاری رہی ۔ ڈاکٹرز نے اپنے کمروں کو تالے لگا دیے جبکہ نرسز اور پیرامیڈیکس اسٹاف نے آوٹ ڈور اور پرچی کاونٹرز کو بند کر دیا تھا۔

ڈاکٹروں کی ہڑتال کے باعث دور دراز سے ہسپتال آنے والے مریضوں کو شدید مشکلات کا سامنا کرنا پڑ ا۔صوبائی دارالحکومت لاہور کے جناح ہسپتال،چلڈرن ہسپتال،پنجاب انسٹی ٹیوٹ آف کارڈیالوجی ،سروسز ہسپتال ،گنگارام ہسپتال سمیت دیگر ہسپتالوں کی او پی ڈیز بند رہیں ۔قبل ازیں گرینڈ ہیلتھ الائنس کی جانب سے وزیراعلیٰ ہاﺅس کی طرف مارچ کرنے اورسرکاری ہسپتالوں میں ہڑتال کرنے پر محکمہ صحت نے بڑا ایکشن لیا تھا۔

محکمہ سپیشلائزڈ ہیلتھ کیئر اینڈ میڈیکل ایجوکیشن نے گرینڈ ہیلتھ الائنس کے چیئرمین سمیت دو ڈاکٹرز کو معطل اور ایک کو نوکری سے برخاست کر دیا تھا۔محکمہ سپیشلائزڈ ہیلتھ کیئر اینڈ میڈیکل ایجوکیشن نے تمام ڈاکٹرز، نرسز اور الائیڈ ہیلتھ سٹاف کی چھٹیوں پر بھی پابندی عائد کر دی تھی۔ہڑتال کے باعث تمام ڈاکٹر، نرسز و عملے کی چھٹیاں منسوخ کر دی گئیں تھیں۔، چھٹیاں منسوخ ہونے پر آج تمام ڈاکٹرز، نرسز و عملے کو ڈیوٹی پر حاضر ہونے کا حکم دیا گیا تھا۔ ڈاکٹرز کی معطلی اور نوکری سے برخاست کرنے کا نوٹیفکیشن جاری کر دیا گیا تھا۔