کورونا: ملک بھر کے اسپتالوں میں آکسیجن کی کمی کا خدشہ

?️ 24 اپریل 2021

اسلام آباد (سچ خبریں) ملک بھر  میں کورونا وائرس کے ہلاکت خیز واقعات سامنے آ رہے ہیں موجودہ بگڑتی صورتحال پر آکسیجن بنانے والی کمپنیوں نے اسپتالوں میں آکسیجن کی کمی کا خدشہ ظاہر کیا ہے اور اس سلسلے میں انہوں نے حکام کو بھی خبردار کر دیا ہے۔ پاکستان آکسیجن لمیٹڈ کے مطابق ملک میں پانچ کمپنیاں ہیں جو اسپتالوں کو آکسیجن فراہم کرتی ہیں۔

تفصیلات کے مطابق پاکستان میں آکسیجن بنانے والی کمپنیوں نے خبردار کیا کہ کورونا کی موجودہ لہر کے دوران اگر آکسیجن کی صنعتی شعبےکو فراہمی نہ روکی گئی تو اسپتالوں میں آکسیجن کی شدید کمی ہو سکتی ہے۔کمپنیوں نے متعلقہ حکام کو یہ خدشہ بھی ظاہر کیا کہ اگر اسپتالوں کو مسلسل آکسیجن کی فراہمی نہ ہوئی تو پاکستان میں بھی بھارت جیسی صورتحال پیدا ہو سکتی ہے۔

کمپنیوں کے مطابق عام حالات میں ایک مہینے کا اسٹاک رکھا جاتا ہے لیکن موجود صورتحال میں انہیں روزانہ کی بنیاد پر اسپتالوں کو آکسیجن فراہم کرنا پڑ رہی ہے۔مزید یہ کہ اگر کراچی اور حیدرآباد میں کورونا کیسز بڑھے تو آکسیجن بنانے والی کمپنیوں پر دباؤ بڑھ جائے گا۔

آکسیجن پیدا کرنے کے لیے پلانٹس کو بلا تعطل بجلی کی ضرورت ہے۔ آکسیجن پروڈیوسرز کا یہ بھی کہنا ہے کہ تمام پلانٹس پوری صلاحیت سے آکسیجن پیدا کریں تو صحت کے شعبے کی ضرورت پوری کر سکتے ہیں۔ خیال رہے کہ گذشتہ چوبیس گھنٹوں کے دوران پاکستان میں کورونا وائرس سے 157 افراد جاں بحق ہوگئے، جس کے بعد اموات کی تعداد 16 ہزار 999 ہوگئی۔