کوئی بھی معاشرہ خواتین کے بغیر ترقی نہیں کرسکتا:اسپیکر قومی اسمبلی

?️ 7 جون 2022

اسلام آباد(سچ خبریں) اسپیکر قومی اسمبلی راجہ پرویز اشرف نے کہا ہے کہ کوئی بھی معاشرہ خواتین کے بغیر ترقی نہیں کرسکتا ۔ انتخابی قوانین کے حوالے سے خواتین ارکان کی تجاویز کا خیر مقدم کیا جائے گا ۔

سپیکر نے منگل کو پارلیمانی وویمن کاکس کے اجلاس میں خصوصی شرکت کی ۔ اس موقع پر انہوں نے کہا کہ پارلیمانی وویمن کاکس پورے پاکستان میں خواتین کی ترجمانی کر ر ہی ہے۔

پارلیمانی وویمن کاکس بغیر کسی سیاسی وابستگی کے ملک بھر میں خواتین کے حقوق کے تحفظ کے لیے اقدامات اٹھا رہی ہے۔ انہوں نے کہا کہ ملکی ترقی کا خواب خواتین کی شمولیت کے بغیر شرمندہ تعبیر نہیں ہو سکتا۔پاکستانی خواتین کی تمام شعبے ہائے زندگی میں شمولیت قابل ستائش ہے۔

خواتین اراکین پارلیمنٹ کا خواتین کے حقوق کے لیے قانون سازی کے عمل میں شمولیت قابل فخر ہے۔

خواتین کے حقوق کے لیے دختر جمہوریت محترمہ بینظر بھٹو کی خدمات کو بھلایا نہیں جا سکتا۔اس وقت پارلیمنٹ میں اہم قانون سازی کا عمل جاری ہے۔پارلیمان میں قانون سازی کے عمل میں خواتین کا فعال کردار ناگزیر ہے۔انتخابی اصلاحات کی قانون سازی کے لیے خواتین کی تجویز کا خیر مقدم کیا جائے گا۔سیکرٹری کاکس شاہدہ رحمانی کو مبارک باد پیش کرتا ہوں ۔امید کرتا ہوں شاہدہ رحمانی کی سربراہی میں وویمن کاکس اپنے اہداف کو حاصل کرنے میں کامیاب ہو گی۔بطور اسپیکر پارلیمانی وویمن کاکس کے لیے میرا ہر ممکن تعاون جاری رہے گا۔سیکرٹری کاکس نے اسپیکر قومی اسمبلی کو کاکس اجلاس میں شرکت پر شکریہ ادا کیا۔ سیکرٹری کاکس نے اسپیکر قومی اسمبلی کو کاکس کے اہداف و اغراض و مقاصد سے آگاہ کیا۔