کسان مارچ، قیدی لے جانے والی گاڑیاں اور ایمبو لینس خیابان چوک پہنچا دی گئیں

?️ 1 اکتوبر 2022

اسلام آباد: (سچ خبریں) کسان اتحاد کے احتجاج کے حوالے سے اسلام آباد پولیس نے تازہ بیان جاری کیا ہے۔ترجمان اسلام آباد پولیس کے مطابق پولیس کے تازہ دم دستے خیابان چوک پہنچ گئے۔

ایف سی کی بھاری نفری بھی خیابان چوک موجود ہے۔ قیدی لے جانے والی گاڑیاں اور ایمبو لینس بھی خیابان چوک پہنچا دی گئی ہیں۔ ڈی آئی جی آپریشنز اور ایس ایس پی آپریشنز اور ضلعی انتظامیہ کے افسران موقع پر موجود ہیں۔

ترجمان اسلام آباد پولیس کے مطابق مظاہرین کی قیادت چیئرمین خالد باٹھ اور جنرل سیکرٹری عمر امین کررہے ہیں۔ ۔مظاہرین درختوں سے شاخیں توڑ کرلاٹھیاں بنا رہے ہیں اور پتھر بھی اکٹھے کرلئے ہیں۔ اگر مظاہرین نے پیش قدمی کی کوشش کی تو انہیں منتشر کرنے کے اقدامات کئے جائیں گے۔

اسلام آباد پولیس نے اپیل کی ہے کہ عورتوں اور بچوں سے گزارش ہے کہ اس طرف رخ نہ کریں۔کسی کو بھی کاروبار زندگی میں خلل ڈالنے اور توڑپھوڑ کی ہرگز اجازت نہیں دی جائے گی۔

 کسان اتحاد کا فیصل ایونیو پردھرنا چوتھے روزبھی جاری ہے۔ مظاہرین نے آج ڈی چوک کی جانب پیش قدمی کا اعلان کر رکھا ہے۔ان کا کہنا ہے کہ وزیر داخلہ نے کہا ہم بجلی کے یونٹ بڑھا دیں گے۔ہمیں ڈرایا دھمکایا گیا، ہمارا کوئی سیاسی مقصد نہیں ہے۔

میڈیا رپورٹس کے مطابق پولیس کو الرٹ رہنے کا حکم دے دیا گیا کسان ڈی چوک کی طرف جائیں گے تو کارروائی ہو گی، پولیس کے تمام افسران کو ہدایات جاری کر دی گئیں۔بلیو ایریا میں تعینات پولیس اور رینجرز کو بھی الرٹ کر دیا گیا۔ڈی سی اسلام آباد کا کہنا ہے کہ ہم نہیں چاہتے کہ پولیس لاٹھی چارج کرے یا حالات خراب ہوں۔چاہتے ہیں امن و امان کی صورتحال برقرار رہے۔کسانوں کیساتھ بغیر طاقت کے استعمال مذکرات کرنا چاہتے ہیں۔