کابل میں دہشت گردانہ حملوں پر پاکستان کا شدید ردعمل

?️ 3 نومبر 2021

اسلام آباد (سچ خبریں) پاکستان نے کابل میں دہشت گرد حملوں پر اپنے ردعمل کا اظہار کرتے ہوئے دہشت گردانہ حملوں کی شدید الفاظ میں  مذمت کی ہے اور  متاثرہ خاندانوں سے دلی ہمدردی اور تعزیت کا اظہار کیا حملوں میں قیمتی جانوں کاضیاع ہوا،بڑی تعدادمیں لوگ زخمی ہوئے۔

تفصیلات کے مطابق پاکستانی دفتر خارجہ کی جانب سے بیان میں کہا گیا ہے کہ کابل میں سردارداؤدخان اسپتال کےنزدیک حملےقابل مذمت ہیں ، حملوں میں قیمتی جانوں کاضیاع ہوا،بڑی تعدادمیں لوگ زخمی ہوئے۔

ترجمان کا کہنا تھا کہ ہم متاثرہ خاندانوں سےدلی ہمدردی اورتعزیت کرتےہیں، جن کے پیارے دہشت گردی کےاس بہیمانہ واقعے کا شکارہوئے اور ہم زخمیوں سے بھی ہمدردی کا اظہار کرتے ہوئے ان کی جلد صحت یابی کی دعا کرتے ہیں۔دفترخارجہ نے مزید کہا کہ پاکستان ہرقسم کی دہشت گردی کی مذمت کا اعادہ کرتا ہے۔

یاد رہے کابل میں واقع ملک کے سب سے بڑے فوجی اسپتال سردار محمد خان داؤد ملٹری اسپتال کے مرکزی دروازے پر یکے بعد دیگرے 2 بم دھماکوں کے نتیجے میں طالبان کی بدری فورس 313 کے سربراہ سمیت 25 جاں بحق ہوئے تھے۔.

بعد ازاں افغان طالبان کے ترجمان ذبیح اللہ مجاہد نے تصدیق کرتے ہوئے کہا تھا کہ سردار داؤدخان اسپتال پر داعش نےحملہ کیا، جس میں خواتین بچوں سمیت7 افرادجاں بحق جبکہ 5 زخمی ہوئے جبکہ جوابی کارروائی میں داعش کے پانچ حملہ آور بھی مارے گئے۔