کابل دھماکوں پر پاکستان کی جانب سے شدید ردِعمل کا اظہار

27 اگست 2021

اسلام آباد (سچ خبریں) حکومت پاکستان نے  کابل میں ہونے والے دہشتگرد حملے پر شدید ردعمل اکا اظہار کرتے ہوئے اس واقعہ کی شدید مذمت کی گئی ہے، ترجمان دفتر خارجہ نے کہا ہے کہ پاکستان کابل ائیرپورٹ پر دہشتگرد حملے کی شدید مذمت کرتا ہے۔

تفصیلات کے مطابق کابل ایئرپورٹ پر دہشتگردی کے نتیجے میں بچوں سمیت کئی جانیں ضائع ہوئیں۔دفتر خارجہ نے بیان جاری کیا پاکستان ہر قسم کی دہشتگردی کی پرزور مذمت کرتا ہے۔ہم سوگوار خاندانوں سے ہمدردی اور تعزیت کرتے ہیں۔

دہشتگرد حملے میں زخمی ہونے والوں کی جلد صحت یابی کے لیے دعاگو ہیں۔خیال رہے کہ کابل ایئرپورٹ کے قریب یکے بعد دیگرے تین دھماکوں کے نتیجے میں جاں بحق ہونے والے افراد کی تعداد 90 ہوگئی ہے۔ غیر ملکی میڈیا کے مطابق دھماکوں میں 140 افراد زخمی ہونے جبکہ ہلاک ہونے والوں میں 13 امریکی فوجی بھی شامل ہیں۔

افغان حکام کا کہنا ہے کہ دھماکوں میں ہلاک اور زخمی ہونے والوں میں خواتین اور بچے بھی شامل ہیں، زخمیوں کو طبی امداد کے لیے مختلف اسپتالوں میں منتقل کر دیا گیا ہے۔ دہشت گرد تنظیم داعش نے دھماکے کی ذمہ داری قبول کرلی۔ رائٹرز کے مطابق دھماکے میں زخمی ہونے والوں میں امریکی اور طالبان کے گارڈزبھی شامل ہیں۔ ترجمان طالبان سہیل شاہین نے بتایا کہ کابل ایئر پورٹ میں لوگوں کے جمع ہونے کی جگہ پر دھماکے ہوئے۔

انہوں نے کہا کہ دھماکوں کے مقامات پر امریکی افواج کا کنٹرول تھا۔ سہیل شاہین نے کہا کہ کابل ایئر پورٹ پرہونے والے دھماکوں کی مذمت کرتے ہیں۔ مجرموں کوانصاف کے کٹہرے میں لانے کی ہرممکن کوشش کریں گے۔

افغان میڈیا کے مطابق کابل ایئر پورٹ کے مشرقی گیٹ پر دھماکہ ہوا اور بعد میں فائرنگ کی آواز بھی سنی گئی ہے۔ جبکہ طالبان ترجمان ذبیح اللہ مجاہد نے دھماکوں کی شدید الفاظ میں مذمت کرتے ہوئے انسانی جانوں کے ضیاع پر دکھ کا اظہار کیا اور زخمیوں کی جلد صحتیابی کے لیے دعا کرتے ہوئے کہا کہ ذمہ داروں کو کیفر کردار تک پہنچایا جائے گا۔