چیئرمین سینیٹ قائم مقام صدر مملکت کے امور انجام دیں گے

?️ 9 اکتوبر 2021

اسلام آباد (سچ خبریں) صدر مملکت کے متحدہ عرب امارات روانہ ہونے کے بعد چیئرمین سینیٹ صادق سنجرانی نےقائم مقام صدرمملکت کی ذمہ داریاں سنبھال لیں، صادق سنجرانی10اکتوبر تک قائم مقام صدر کے امور انجام دیں گے اس حوالے سے باضابطہ نوٹیفکیشن بھی جاری کر دیا گیا ہے۔

تفصیلات کے مطابق چیئرمین سینیٹ صادق سنجرانی نے صدرمملکت کے دبئی روانگی کے پیش نظر قائم مقام صدرمملکت کی ذمہ داریاں سنبھال لیں۔ کابینہ ڈویژن کی جانب سے قائم مقام صدر کا باضابطہ نوٹیفکیشن جاری کردیاگیا ہے، جس میں کہا گیا ہے کہ صادق سنجرانی 10 اکتوبر تک قائم مقام صدر کے امور انجام دیں گے۔

یاد رہے کہ صدر عارف علوی دبئی ایکسپو 2020 شرکت کیلئے دو روزہ دورے پر متحدہ عرب امارات پہنچ گئے، وہ اپنے دورے کے دوران پاکستانی پیویلین کے دورے کے ساتھ ساتھ یو اے ای کی اعلیٰ قیادت سے ملاقات بھی کریں گے اور مختلف امور پر تبادلہ خیال بھی کیا جائے گا۔

واضح رہے کہ صدرعارف علوی دبئی میں روشن اپنا گھر پروگرام کی تقریب رونمائی میں شرکت کریں گے اور دبئی میں کاروباری شخصیات، کمپنیوں کےسی ای اوز سےملاقات کریں گے۔ صدر پاکستان کے دورے کا مقصد دونوں ممالک کے مابین تجارتی ومعاشی تعلقات کو مستحکم و مضبوط کرنا ہے۔