پیپلزپارٹی عوامی خدمت پر توجہ دے: فردوس عاشق

?️ 5 جون 2021

لاہور(سچ خبریں) وزیر اعلیٰ پنجاب کی معاون خصوصی برائے اطلاعات فردوس عاشق اعوان نے کہا ہے کہ پیپلزپارٹی ملکی تعمیر و ترقی اورحقیقی عوامی خدمات سے کیوں خوفزدہ ہے ، پیپلز پارٹی کو ذاتی حملوں کی بجائے عوامی خدمت پر توجہ دینا چاہئے۔

تفصیلات کے مطابق  سماجی رابطے کی ویب سائٹ ٹویٹر پرٹویٹ میں کہا ہےکہ پنجاب سمیت ملک بھر میں بے شمار منصوبوں پر کام جاری ہے اور وزیراعلیٰ عثمان بزدار کی قیادت میں کئی منصوبے کامیابی سے مکمل ہوچکے ہیں، جن سے پنجاب کے پسماندہ علاقوں کے عوام کی زندگی میں نمایاں بہتری آئے گی۔

فردوس عاشق اعوان نے کہا کہ ذاتی مفادات کی جنگ لڑتی اپوزیشن حقیقی عوامی خدمت اور ملکی تعمیر و ترقی سے نہ جانے کیوں خائف ہے۔انہوں نے مزید کہا کہ  پرچی شہزادے کو عوامی وزیر اعلی عثمان بزدار پر تنقید سے پہلے قائم علی شاہ اور اب مراد علی شاہ کی شکل میں سندھ کے عوام کو دی گئی سوغاتوں کے بارے میں سوچنا چاہیے۔

اپنے ٹویٹ میں مزید  کہنا تھا کہ  دہائیوں سے سندھ کے عوام پر مسلط پیپلز پارٹی ذاتی حملوں کی بجائے عوامی خدمت پر توجہ دے۔دوسری جانب پاکستان پیپلزپارٹی کے چیئرمین بلاول بھٹو زرداری کا اپنے بیان میں کہنا تھاکہ پیپلز پارٹی کی معاشی پالیسیاں ہی ملک کو آگے لے جاسکتی ہیں جبکہ روٹی، کپڑا، مکان اور روزگار کے وعدے کو پاکستان پیپلزپارٹی نے ہی اپنے ہر دور میں نبھایا تھا۔