پی ٹی آئی نے عمران خان کے امریکا سے متعلق حالیہ بیان پر چلنے والی رپورٹس مسترد کر دیں

?️ 14 نومبر 2022

لاہور: (سچ خبریں) پاکستان تحریک انصاف نے چیئرمین پی ٹی آئی عمران خان کے حالیہ بیان سے متعلق میڈیا رپورٹس مسترد کر دیں۔پی ٹی آئی کا کہنا ہے فنانشل ٹائمز کو دیے گے انٹرویو کی آڈیو ریکارڈنگ موجود ہے۔عمران خان نے کبھی یہ نہیں کہا کہ امریکی سازش نہیں ہوئی۔انٹرویو میں کہا کہ ڈونلڈ لو نے پاکستان کو دھمکیاں دیں لیکن اب وہ وقت گزر گیا ہمیں آگے دیکھنا ہے جس کا راستہ شفا ف انتخابات ہیں۔

سابق وفاقی وزیر شیریں مزاری نے چیئرمین پی ٹی آئی کے غیر ملکی میڈیا کو دیئے گئے انٹرویو کی بنیاد پر چلنے والی غلط خبروں کو رد کر دیا۔انہوں نے کہا کہ پاکستانی چینلز اور اخبارات فنانشل ٹائمز کی انگریزی کو سمجھ ہی نہیں سکے۔اس میں کہیں بھی یہ نہیں لکھا کہ ہم اس بیانیے سے پیچھے ہٹ گئے۔

عمران خان نے تو یہ کہا ہے کہ اب وہ بات پرانی ہو چکی ہے اب آگے بڑھنے کا وقت ہے اور اس کا طریقہ شفاف انتخابات ہیں۔

خیال رہے کہ برطانوی اخبار کو دیے گئے انٹرویو میں سابق وزیراعظم نے کہا امریکی سازش کا معاملہ ختم ہو چکا، اب امریکہ پر الزام نہیں لگاتا اور اگر دوبارہ منتخب ہوا تو امریکہ سے باوقار تعلقات رکھنا چاہوں گا کیوں کہ پاکستان اور امریکہ کے تعلقات غلام اور مالک کے رہے ہیں لیکن اس میں بھی زیادہ قصور پاکستانی حکومتوں کا تھا۔ ایک سوال کے جواب میں عمران خان نے کہا کہ پاکستان دیوالیہ ہونے کے قریب ہے، جب آئی ایم ایف کے کچھ اقدامات سے آپ کی معیشت سکڑ جائے تو ہم اپنا قرض کیسے ادا کریں گے؟ سیاسی استحکام کی بحالی کا واحد راستہ قبل از وقت صاف اور شفاف انتخابات ہی ہیں، اگر فوری انتخابات نہ ہوئے تو معاشی تباہی اس سے کہیں زیادہ ہوگی۔