پولیو کے مکمل خاتمے تک شراکت داروں کے تعاون سے اقدامات جاری رہیں گے۔ وزیراعظم

?️ 28 جنوری 2026

اسلام آباد (سچ خبریں) وزیراعظم شہباز شریف کا انسداد پولیو کے لئے گیٹس فاؤنڈیشن اور برادر ملک سعودی عرب کےتعاون پر اظہارتشکرکہا پاکستان میں پولیو کے مکمل خاتمے تک بل گیٹس فاؤنڈیشن جیسے قابل اعتماد شراکت داروں کے تعاون سے اقدامات جاری رکھے جائیں گے۔

اسلام آباد میں وزیراعظم سے گیٹس فاؤنڈیشن کے اعلی سطحی وفد نے ملاقات کی، وفدمیں گیٹس فاؤنڈیشن کے صدر برائے عالمی ترقی کرس ایلیاس اور ڈائریکٹر اور ڈپٹی ڈائریکٹر شامل تھے، وفد نے پاکستان میں کامیابی سے جاری انسداد پولیو مہم پر مکمل اعتماد کا اظہارکیا۔

انہوں نے وزیراعظم پاکستان کوبل گیٹس کی جانب سے نیک خواہشات کا پیغام بھی دیا، کہا امید کی جا سکتی ہے کہ جاری اقدامات کے نتیجے میں پاکستان جلد اس بیماری کے مکمل خاتمے کی منزل حاصل کر لے گا، ملاقات میں وفاقی وزیر برائے منصوبہ بندی احسن اقبال نے انسداد پولیو کے لیے پبلک سیکٹر ڈیویلپمنٹ کے تحت جاری اقدامات سے وفد کو آگاہ کیا۔

وفاقی وزیر برائے صحت سید مصطفی کمال نے وزیراعظم کی رہنمائی اور بل گیٹس کی ٹیم کے تعاون کا شکریہ ادا کیا، وزیراعظم کی فوکل پرسن برائے انسداد پولیو عائشہ رضا فاروق نے بھی ملاقات میں انسداد پولیو کے تحت تمام صوبوں اور شہروں میں جاری اقدامات پر حاضرین کو آگاہ کیا۔