پاکستانی عوام آسٹریلوی کرکٹ ٹیم کے منتظر ہیں

?️ 10 دسمبر 2021

اسلام آباد (سچ خبریں) تفصیلات کے مطابق آسٹریلوی کرکٹ ٹیم کے سکیورٹی وفد نے وزارت داخلہ کا دورہ کیا اور وزیر داخلہ شیخ رشید احمد اور وزارت داخلہ کے اعلیٰ حکام سے ملاقات کی پی سی بی کے ڈائریکٹر انٹرنیشنل کرکٹ ذاکر خان بھی ملاقات میں موجود تھے۔
وزیرداخلہ شیخ رشید احمد نے کہا کہ پاکستانی عوام آسٹریلوی کرکٹ ٹیم کے منتظر ہیں، انہیں فول پروف سکیورٹی دی جائے گی۔ وزیر داخلہ شیخ رشید احمد نے ٹیم کی فول پروف سکیورٹی کی یقین دہانی کرواتے ہوئے کہا کہ آسٹریلوی ٹیم کی سکیورٹی کے تمام انتظامات کرلیے سندھ اور پنجاب حکومت کا سکیورٹی اداروں سے مکمل رابطہ ہے۔

شیخ رشید کا کہنا تھا کہ اُمید ہے شائقین کو اچھی کرکٹ دیکھنے کو ملے گی۔ شیخ رشید نے کہا کہ ٹیم بھیجنے کے اعلان پر آسٹریلیوی کرکٹ بورڈ کے مشکور ہیں،پاکستان آمد پر آسٹریلوی ٹیم کا شاندار استقبال کیا جائے گا۔ خیال رہے کہ دو روز قبل آسٹریلین کرکٹ بورڈ کے تین رکنی سیکیورٹی وفد نے ایس ایس یو ہیڈ کوارٹرز کا دورہ کیا اور آسٹریلین کرکٹ ٹیم کے متوقع دورہ پاکستان سے متعلق سیکیورٹی انتظامات پر ڈی آئی جی سیکیورٹی اینڈ ایمرجنسی سروسز ڈویڑن مقصود احمد کی زیر صدارت ہونے والے اجلاس کے دوران بریفنگ لی۔
وفد میں بنجامن کارل اولیور، گرینڈن جیرارڈ اور سٹورٹ اینڈریو بیلی شامل ہیں۔ اجلاس میں آسٹریلین سیکیورٹی وفد، پی سی بی اور رینجرز حکام، کمانڈنٹ ایس ایس یو اور دیگر اعلیٰ افسران نے شرکت کی۔ڈی آئی جی سیکیورٹی نے وفد کو آسٹریلین کرکٹ ٹیم کے متوقع دورہ پاکستان اور خاص طور پر نیشنل اسٹیڈیم کراچی میں کھیلے جانے والے میچز سے متعلق کیے گئے سیکیورٹی انتظامات سے آگاہ کیا جبکہ کمانڈنٹ ایس ایس یو ذیشان شفیق صدیقی نے تفصیلی بریفنگ دی۔