موجودہ حکومت کی اولین ترجیح عام آدمی کا تحفظ ہے: وزیر اعظم

🗓️ 30 اگست 2021

اسلام آباد (سچ خبریں) وزیراعظم عمران خان نے اشیائے ضروریہ کی قیمتوں میں استحکام کی ہدایت کرتے ہوئے کہا ہے کہ موجودہ حکومت کی اولین ترجیح  عام آدمی کا تحفظ ہے، انتظامی اقدامات کےنتائج سامنے آنے چاہیں تاکہ عوام کو ریلیف ملے۔بنیادی اشیائے ضروریہ کی قیمتوں سے عام آدمی متاثر ہے۔

تفصیلات کے مطابق وزیراعظم عمران خان کی زیر صدارت اجلاس ہوا ، جس میں وفاقی وزراشوکت ترین، خسرو بختیار، اسد عمر،وزیر خوراک مشیر تجارت ، فرخ حبیب ، معاونین خصوصی ،چیف سیکرٹریز اوردیگرسرکاری حکام شریک ہوئے۔اجلاس میں مہنگائی میں کمی اور اشیائے ضروریہ کی قیمتوں کو کنٹرول کرنے پر مشاورت کی گئی اور وزیراعظم کوبنیادی اشیائے ضروریہ کی طلب و رسد اور ان کی قیمتوں پر بریفنگ دی گئی۔

وزیر اعظم کو بنیادی اشیائے ضروری ، منڈی اور پرچون کے نرخوں کا جائزہ پیش کیا گیا جبکہ چینی اور گندم کے اسٹاک اورضروریات پورا کرنے کے اقدامات پر بھی بریفنگ دی گئی اور خوردنی تیل کی قیمتوں میں واضح کمی لانے کےاقدامات سے بھی آگاہ کیا گیا۔

چیف سیکرٹری پنجاب نے قیمتوں کے حوالے سے انتظامی اقدامات سے آگاہ کرتے ہوئے بتایا کہ قیمتوں کےاستحکام میں غفلت پرکاروائی کی جارہی ہے، 7اسسٹنٹ کمشنرز، مارکیٹ کمیٹیوں کے 2سیکرٹری معطل اور 2 ڈپٹی کمشنرز کو وارننگ جاری کی ہے۔بریفنگ میں کہا گیا کہ خوردنی تیل کی قیمتوں پراسٹیک ہولڈرز سے معاملات حتمی مراحل میں ہیں، خوردنی تیل کی قیمتوں میں دس سے پندرہ روپے فی کلو کمی کی متوقع ہے۔

اجلاس میں وزیر اعظم عمران خان نے کہا بنیادی اشیائے ضروریہ کی قیمتوں سے عام آدمی متاثر ہوتا ہے، عام آدمی کا تحفظ موجودہ حکومت کی اولین ترجیح ہے۔وزیراعظم نے چیف سیکرٹریز کواشیائے ضروریہ کی قیمتوں میں استحکام کی ہدایت کرتے ہوئے کہا محض انتظامی افسران کے خلاف کارروائی ناکافی ہے، انتظامی اقدامات کےنتائج سامنے آنے چاہیں تاکہ عوام کو ریلیف ملے۔عمران خان نے ہدایت کی کہ چینی اورگندم کی ضروریات کےمد نظر بروقت اقدامات کو یقینی بنایا جائے۔