مراد سعید کا سوات ایئرپورٹ سے بین الاقوامی پروازوں کے آغاز کا اعلان

🗓️ 26 مارچ 2021

خیبرپختونخوا(سچ خبریں) وفاقی وزیر مراد سعیدنے سیدو شریف ایئرپورٹ کی تقریب میں ایک اہم اعلان کرتے ہوئے کہا کہ   آج ہم سب کے لئے خوشی کا دن ہے، سترہ سال بعد سوات کا سیدو شریف ائیر پورٹ بحال ہوگیا، دوسرے مرحلے میں بین الاقوامی پروازوں کابھی آغاز ہو جائے گا۔

تفصیلات کے مطابق وفاقی وزیر مواصلات مراد سعید نے سیدوشریف ایئرپورٹ کی افتتاحی تقریب سے خطاب میں 17سال بعد ایئرپورٹ بحال ہونے پر مبارکباد دیتے ہوئے کہا دوسرے مرحلے میں بین الاقوامی پروازوں کا آغاز ہوگا۔

مراد سعید کا کہنا تھا کہ دہشت گردی کیخلاف جنگ میں قربانیاں دینےوالوں کو خراج عقیدت پیش کریں، دیر موٹرے بھی انشااللہ اسی سال بنے گا جبکہ مالاکنڈ ،سوات کے لوگوں کیلئے علاج کی سہولت بھی مفت ہے۔وفاقی وزیر نے وزیراعظم عمران خان ، سی ای اوپی آئی اے ارشد ملک ، وزیراعلیٰ کےپی اور وفاقی وزیرغلام سرور کا شکریہ ادا کرتے ہوئے کہا سیاحت کے شعبے میں حکومت نے اہم اقدامات کئے ہیں۔

دوسری جانب وفاق وزیر ہوا بازی غلام سرور نے تقریب سے خطاب کرتے ہوئے کہا آج سوات سیدوشریف ایئرپورٹ 17سال بعدبحال ہونے پر بہت خوشی ہے، سوات کیساتھ میرا دیرینہ رشتہ بھی ہے۔غلام سرور کا کہنا تھا کہ سوات میں زلزلہ ،سیلاب آئے تباہی اور نقصانات ہوئے ،سوات کےعوام نے دہشتگردی کا مقابلہ کیا بے پناہ نقصان اٹھایا اور فورسز نے بھی دہشتگردی کیخلاف جانوں کا نذرانہ پیش کیا۔

وفاقی وزیر نے کہا کہ سیدوشریف ایئرپورٹ کی بحالی پر پی آئی اے بھی مبارکبادکی مستحق ہے، سوات،مالاکنڈ میں سیاحت اور ایکسپورٹ میں بھی اضافہ ہوگا، سیاحت اور ایکسپورٹ کے فروغ کا کریڈٹ وفاق اور کے پی حکومت کو جائے گا۔ان کا مزید کہنا تھا کہ پی آئی اےکی سوات کیلئےپروازیں وقت کی اہم ضرورت ہیں، ہفتےمیں2پروازیں لاہوراوراسلام آباد سےسوات تک شروع کردی گئیں، پروازوں میں مزید اضافہ کیاجائےگا، ان پروازوں سےسوات کےعلاقےمیں مزید ترقی دیکھنے کو ملے گی۔