عمران خان کو کمزور سمجھ کر اپوزیشن کو منہ کی کھانی پڑی: فواد چوہدری

?️ 27 مارچ 2021

لاہور(سچ خبریں) وفاقی وزیر برائے سائنس و ٹیکنالوجی فواد چوہدری کا کہنا ہے کہ اپوزیشن نے ہمیشہ عمران خان کو کمزور سمجھا ہے اور اسی کمزور سمجھنے کی بنا پر اسے منہ کی کھانی پڑی ہے،جب بھی ہم مذاکرات کی بات کریں اپوزیشن عمران خان کو کمزور سمجھتے ہیں۔

تفصیلات کے مطابق وفاقی وزیر برائے سائنس و ٹیکنالوجی فواد چوہدری نے پریس کانفرنس کرتے ہوئے کہا کہ سیمی کنڈکٹر انڈسٹری کی طرف بڑھ رہے ہیں، کوشش کر رہے ہیں ٹیکنالوجی بزنس میں اپنا حصہ ڈالیں۔

وفاقی وزیر کا کہنا تھا کہ ٹیکنالوجی کی بنیاد سیمی کنڈکٹر پر رکھی جاتی ہے، امریکا اور چین کی جنگ سیمی کنڈکٹر پر ہے، چین سیمی کنڈکٹر انڈسٹری کے لیے 100 بلین ڈالر کا پروجیکٹ لا رہا ہے۔ کوشش ہے چین کے اس پروجیکٹ میں ہم اپنا حصہ ڈالیں۔

سیاسی صورتحال پر تبصرہ کرتے ہوئے انہوں نے کہا کہ وزیر اعظم نے اپوزیشن کو سمجھایا تھا سینیٹ الیکشن پر ان کو ہی نقصان ہوگا، اگر وہ اس بات کو سمجھ جاتے تو سینیٹ الیکشن مذاق نہیں بنتا۔

فواد چوہدری کا کہنا تھا کہ پیپلز پارٹی اور مسلم لیگ ن پاکستان کی اہم جماعتیں ہیں، پیپلز پارٹی اور مسلم لیگ ن سیاست بچوں کے حوالے نہ کرے، بچوں کے حوالے کرنے سے ان کی سیاست تباہ ہوگی۔ ن لیگ کا اثر وسط پنجاب سے محدود ہوگیا ہے، پیپلز پارٹی کا اثر اندرون سندھ تک محدود ہوگیا ہے۔

انہوں نے کہا کہ پیر سے ہم سیاسی جماعتوں سے دوبارہ رابطے شروع کریں گے، اپوزیشن ترامیم بدلنا چاہتی ہے تو پارلیمنٹ میں آئے، جب بھی ہم مذاکرات کی بات کریں آپ عمران خان کو کمزور سمجھتے ہیں۔ عمران خان کو کمزور سمجھ کر آپ نے ہمیشہ منہ کی کھائی۔

وفاقی وزیر کا کہنا تھا کہ آئیں انتخابی اصلاحات اور دیگر معاملات کی طرف بڑھتے ہیں، اپوزیشن کو اپنی سیاست پر نظر ثانی کی ضرورت ہے۔ یہ جن کو پارلیمنٹ میں نامزد کریں گے ان سے ہم بات کریں گے۔