ضلع کرم میں بنکرز کے خاتمے کا عمل دوبارہ شروع، 10 سے زائد مسمار

29 جنوری 2025

پشاور: (سچ خبریں) خیبرپختونخوا کے ضلع کرم میں متحارب فریقین کی جانب سے تعمیر کردہ بنکرز کی مسماری کا عمل دوبارہ شروع ہوگیا، فریقین نے اسلحہ جمع کروانے کے لائحہ عمل پر بھی کام شروع کردیا۔

ڈان نیوز مطابق خیبرپختونخوا کے ضلع کرم میں متحارب فریقین کی جانب سے تعمیر کردہ بنکرز کی مسماری کا عمل دوبارہ شروع ہوگیا ہے جس میں 10سے زائد بنکرز مسمار کردیے گئے ہیں۔

سرکاری ذرائع کے مطابق علاقے میں بنکرز کی مجموعی تعداد 200 سے زیادہ ہے، فریقین نے اسلحہ جمع کروانے کے لائحہ عمل پر بھی کام شروع کردیا ہے۔

واضح رہے کہ اپرکرم اور پاراچنار کے مشران کا جرگہ کمشنر ہاؤس کوہاٹ میں گزشتہ روز منعقد ہوا تھا جس میں بنکرز کے خاتمے، اسلحہ جمع کرانے اور راستے کھولنے کا جائزہ لیا گیا تھا۔

علاوہ ازیں ضلع کرم میں 4 ماہ سے راستوں کی بندش کے باعث محصور علاقوں میں گزشتہ روز 100 سے زائد چھوٹی بڑی گاڑیوں پر مشتمل امدادی قافلے کے ذریعے سبزیاں، پھل اور دیگر اشیا پاراچنار اور ملحقہ علاقوں میں پہنچائی گئی تھیں۔

ادھر آرپی او کوہاٹ نے گزشتہ روز کمشنر کوہاٹ کے ہمراہ لوئر کرم کے مختلف علاقوں کا دورہ کیا اور نقصانات کا جائزہ لیا، ایڈیشنل اسسٹنٹ کمشنر ہنگو نے بھی متاثرین کرم کے لیے گورنمنٹ ڈگری کالج ٹل میں قائم کیمپ کا دورہ کیا اور پی ڈی ایم اے کی طرف سے دیا گیا سامان متاثرین میں تقسیم کیا جن میں رضائی، کمبل، ہائی جین کٹ سمیت دیگر اشیا شامل تھیں۔