شہبازشریف کا دورہ ملائیشیا، ٹیکنالوجی سمیت متعدد شعبوں پر اتفاق ہوا۔ دفتر خارجہ

?️ 10 اکتوبر 2025

اسلام آباد (سچ خبریں) وزیراعظم محمد شہباز شریف کے ملائیشیا کے دورے کے حوالے سے دفتر خارجہ کا بیان آگیا۔

دفتر خارجہ کے ترجمان کے مطابق شہباز شریف نے ملائیشیا کے وزیر اعظم کی دعوت پر دورہ کیا، اسحاق ڈار اور سینئر وزراء بھی وزیر اعظم کے ہمراہ تھے۔ ترجمان نے بتایا کہ وزیر اعظم ملائیشیا نے حلال گوشت کی درآمد کے معاہدے کا خیر مقدم کیا، شہبازشریف نے ملائیشیائی وزیر اعظم کی کتاب کی تقریب رونمائی میں بھی شرکت کی اور فریقین نے سائنس، دفاع، ٹیکنالوجی سمیت متعدد شعبوں میں تعاون کے فروغ پر اتفاق کیا۔

دفتر خارجہ کے ترجمان کا کہنا تھا کہ وزیراعظم نے آسیان کی چئیرمین شپ کے لیے ملائیشیا کی حمایت کا اعادہ کیا، دورے میں متعدد نئے شعبوں میں تعاون کے فروغ کی یادداشتوں پر دستخط کیے۔ دوسری جانب ترجمان کا کہنا تھاکہ دورے کے دوران اسحاق ڈار نے قومی اسمبلی میں فلسطین اور دورہ نیویارک پر خطاب کیا اور وزیراعظم کے دورہ امریکہ میں امریکی صدر سے ملاقات پر ایوان کو اعتماد میں لیا۔

ترجمان نے کہا کہ پاکستان اسرائیلی افواج کی گلوبل صمود فلوٹیلا پر حملے اور گرفتاریوں کی شدید مذمت کرتا ہے، سابق سینیٹر مشتاق اسرائیلی فوجیوں کی حراست سے آزاد ہو چکے ہیں، پاکستان غزہ میں جنگ بندی کے معاہدے کا خیرمقدم کرتا ہے، ہم اس جنگ بندی ڈیل میں قطر، مصر اور سعودی عرب کے ان تھک کردار کو سراہتے ہیں۔