سیلاب متاثرین کو فوری امدادی رقم ادا کی جائے۔ علی امین گنڈاپور

?️ 19 اگست 2025

صوابی (سچ خبریں) وزیراعلی خیبرپختونخوا علی امین گنڈاپور نے سیلاب متاثرین کو فوری امدادی رقم ادا کرنے کی ہدایت کردی۔

میڈیا سے گفتگو کرتے ہوئے علی امین گنڈا پور کا کہنا تھا کہ بونیر، سوات، دیر سمیت مختلف اضلاع میں راستے بحال ہوگئے ہیں، یہ قدرتی آفت ہے، متاثرین کی بھرپور مدد کریں گے، بارشوں سے 340 افراد شہید ہوئے، شہادتوں کی تعداد 500 تک ہوسکتی ہے۔ انہوں نے کہا کہ جن کے گھر گرے انہیں گھر بنا کردیں گے، جو گھر پانی کے راستوں میں ان کو بھی محفوظ جگہوں پر منتقل کریں گے، عدالتوں سے درخواست ہے کہ تجاوزات کرنے والوں کو اسٹے نہ دیا کرے۔

وزیراعلی خیبر پختونخوا کا کہنا تھا کہ تجاوزات کے خلاف بھرپور مہم جاری رکھیں گے، سرکاری ملازمین ایک دن کی تنخواہ دیں گے، مالی طورپرہمارا صوبہ مستحکم ہے، ہم نے متاثرین کو معاوضہ دینا بھی شروع کردیا ہے۔

علی امین گنڈا پور نے بروقت ریسکیو اور فوری رسپانس دینے پر متعلقہ محکموں کو خراجِ تحسین پیش کرتے ہوئے صوابی میں ریلیف سرگرمیاں تیز کرنے کے لیے ریلیف ایمرجنسی نافذ کرنے کی ہدایت دی۔

انہوں نے محکمہ ریلیف اور ضلعی انتظامیہ کو متاثرہ خاندانوں کو معاوضوں کی فوری ادائیگی یقینی بنانے کی ہدایت کرتے ہوئے مزید کہا کہ صوبائی حکومت نے شہداء کے لواحقین اور زخمیوں کے لیے امدادی پیکیج کی رقم ڈبل کر دی ہے۔