طالبان کے وزیر خارجہ امیرخان متقی نے قطر میں امریکی ایلچی سے ملاقات کی۔
الجزیرہ چینل کی رپورٹ کے مطابق طالبان کے وزیر خارجہ امیر خان متقی نے قطر میں امریکہ کے خصوصی ایلچی ٹامس ویسٹ سے ملاقات اور گفتگو کی،اطلاعات کے مطابق افغانستان کے لیے امریکہ کے خصوصی ایلچی ٹامس ویسٹ نے طالبان کی عبوری حکومت کے وزیر خارجہ امیر خان متقی کے ساتھ قطر کے دارالحکومت دوحہ میں ملاقات کی۔
ملاقات میں دونوں رہنماؤں نے افغانستان میں امن و امان، لڑکیوں کی تعلیم اور خواتین کی ملازمتوں سے متعلق امور پر تبادلہ خیال کیا جب کہ افغان عوام کے لیے امدادی پیکیجز کی فراہمی کے طریقہ کار پر بھی گفتگو کی گئی۔
ملاقات میں امریکہ کے خصوصی ایلچی نے طالبان حکومت کے وزیر خارجہ امیر خان متقی کو بتایا کہ افغانستان میں لڑکیوں کے اسیکنڈری اسکولوں کی بندش اور خواتین کی ملازمتوں پر واپسی سے متعلق فیصلوں کی عالمی سطح پر مخالفت کی جا رہی ہے۔
یاد رہے کہ اس سے قبل افغانستان میں طالبان کے عبوری وزير داخلہ سراج الدین حقانی نے سی این این کے ساتھ گفتگو میں امریکہ اور طالبان کے درمیان تعلقات کی طرف اشارہ کرتے ہوئے کہا تھا کہ امریکہ طالبان کا دشمن نہیں بلکہ دوست ہے۔