جی ایچ کیو حملہ کیس؛ عمران خان اور شاہ محمود قریشی سمیت دیگر ملزمان کی پیشی کا حکم

?️ 9 اپریل 2025

اسلام آباد: (سچ خبریں) عدالت نے جی ایچ کیو حملہ کیس میں پاکستان تحریک انصاف کے بانی چیئرمین عمران خان اور سینئر پی ٹی آئی رہنماء شاہ محمود قریشی سمیت دیگر ملزمان کو پیش ہونے کا حکم دے دیا، اب تک جی ایچ کیو کیس میں 25 گواہان کے بیان ریکارڈ کیے جا چکے ہیں۔

تفصیلات کے مطابق جی ایچ کیو حملہ کیس کی اسلام آباد انسداد دہشتگردی کی خصوصی عدالت میں سماعت ہوئی جہاں اے ٹی سی جج امجد علی شاہ نے سماعت کی، سابق صوبائی وزیر پنجاب راجہ بشارت انسداد دہشت گردی کی خصوصی عدالت میں پیش ہوئے، عدالت میں وزیر اعلی خیبر پختونخواہ علی امین گنڈا پور کی بھی حاضری لگائی گئی۔

بتایا گیا ہے کہ آج کی سماعت کے دوران جی ایچ کیو حملہ کیس کے تمام 119 ملزمان کو طلبی کے نوٹس جاری کیے گئے، عدالت نے 2 گواہان کی طلبی کے بھی نوٹس جاری کردیئے، اس کے علاوہ اے ٹی سی عدالت کی جانب سے بانی چیئرمین پی ٹی آئی عمران خان کو بھی جیل عدالت میں پیش ہونے کا حکم دیا گیا جب کہ عدالت نے شاہ محمود قریشی کو لاہور جیل سے 12 اپریل کو پیش کرنے کا حکم دیا۔

معلوم ہوا ہے کہ عدالت نے آئندہ سماعت پر گواہان پر جرح کا بھی وکلائے صفائی کو حکم جاری کیا، عدالت نے جی ایچ کیو حملہ کیس تفتیشی ٹیم کو مکمل ریکارڈ سمیت اڈیالہ جیل پیش ہونے کا حکم دیا اور کہا کہ عدالت آئندہ تاریخ پر مجسٹریٹ مجتبیٰ اور گواہ سب انسپکٹر ریاض کی طلبی کا نوٹس جاری کرے گی، سپریم کورٹ کی 4 ماہ کی ڈائریکشن کے مطابق کیس کا فیصلہ کیا جائے گا، اس لیے آئندہ کسی بھی فریق کو بلاجواز التواء نہیں ملے گا اور اب سے ہفتہ میں 2 بار جی ایچ کیو حملہ کیس کی سماعت ہوگی، بعد ازاں عدالت نے جی ایچ کیو حملہ کیس کی سماعت 12 اپریل تک ملتوی کردی۔