جو ہمارے شہدا کی توہین کرتا ہے ہم بھی ان کا احترام نہیں کریں گے، مریم نواز

5 جون 2023

مظفر آباد: (سچ خبریں) پاکستان مسلم لیگ (ن) کی چیف آرگنائزر مریم نواز نے کہا ہے کہ جو ہمارے شہدا کی توہین اور بے حرمتی کرتا ہے اور ان کی یادگاروں کو جلاتا ہے تو ہم بھی ان کا احترام نہیں کریں گے۔

کشمیر میں جلسے سے خطاب کرتے ہوئے مسلم لیگ (ن) کی چیف آرگنائزر مریم نواز نے کہا کہ جو ہمارے شہدا کی توہین اور بے حرمتی کرتا ہے اور ان کی یادگاروں کو جلاتا ہے تو ہم بھی ان کا احترام نہیں کریں گے۔

مریم نواز نے کہا کہ جو شہدا کی بے حرمتی کرے وہ ہم میں سے نہیں ہے، اگر وہ ہم میں سے نہیں ہو سکتا تو پاکستانی بھی نہیں ہو سکتا۔

مریم نواز نے کہا کہ کوئی جتنا بھی پرتشدد اور غصے میں ہو، کوئی پاکستانی اپنے ملک کو آگ لگانے کی جرئت نہیں کر سکتا، 9 مئی کو جو ہوا، شہدا کے والدین کی آنکھو میں جو آنسوں آئے پوری پاکستانی قومی اور آزاد کشمیر اس پر شرمندہ ہے، ہم شہدا کے اہل خانہ کے سامنے نظریں اٹھانے کے قابل نہیں ہیں۔

رہنما مسلم لیگ (ن) نے کہا کہ وہ شخص جس بنکر میں چھپ کر بیٹھا ہے سن لے، پاکستانی قوم کبھی اسے معاف نہیں کرے گی، کشمیری اس کو عبرت کا نشان بناکر چھوڑیں گے۔

انہوں نے کہا کہ اس شخص نے صرف پاکستان اور اس کی دفاعی تنصیبات کو آگ نہیں لگائی بلکہ ٹرمپ کے پہلو میں بیٹھ کر یہ شخص کشمیر کا سودہ بھی کرکے آیا تھا۔

مریم نواز نے کہا کہ جلاؤ گھیراؤ اور انتشار، نفرت اور فتنہ بازی کی سیاست سے عمران خان یاد آتا ہے، جس کے پاس کاکردگی دکھانے کے لیے کچھ نہیں ہوتا تو وہ شخص یہ حرکتیں کرتا ہے۔

انہوں نے کہا کہ 2021 میں دھاندھلی کرکے جس جماعت کو جموں اور کشمیر پر مسلط کیا گیا تھا وہ جہاں سے آئی تھی وہاں واپس چلی گئی ہے، جس نے مسلم لیگ (ن) کو ٹوڑنے کی کوششیں کی، مسلم لیگ (ن) تو نہیں ٹوٹی لیکن اس جماعت کی آج کرچیاں بھی دیکھنے کو نہیں ملتیں۔

مریم نواز نے کہا کہ آزاد کشمیر میں جس جماعت کا وزیراعظم تھا وہی عمران خان کے خلاف کھڑا ہوگیا ہے اور کہتا ہے کہ 9 مئی کے حملے کا منصوبہ (عمران خان) نے بنایا تھا اور اگر کسی نے آزاد کشمیر کی خدمت کی تو وہ مسلم لیگ (ن) ہے۔

انہوں نے کہا کہ نواز شریف نے خود تکالیف برداش کیں لیکن پاکستان پر کبھی آنچ نہیں آنے دی، نواز شریف جب بھی اقتدار میں آتا ہے، ہر جگہ ترقی نظر آتی ہے۔