?️ 19 جون 2025

اسلام آباد: (سچ خبریں) وزیراعظم پاکستان شہباز شریف نے کہا ہے 6 سے 12 لاکھ روپے سالانہ کمانے والے تنخواہ دار طبقے پر سیلز ٹیکس کی شرح کو 5 فیصد سے کم کر کے 1 فیصد کر دیا گیا ہے، اس سے قبل انکم ٹیکس ریٹ سلیب کی شرح میں کچھ ابہام موجود تھا۔

ڈان اخبار میں شائع رپورٹ کے مطابق فنانس بل 26-2025 میں اشارہ دیا گیا تھا کہ ملازمت پیشہ افراد پر انکم ٹیکس کی شرح 5 فیصد سے کم ہو کر 1 فیصد ہو گی، وفاقی وزیر خزانہ محمد اورنگزیب نے بجٹ خطاب میں کہا تھا کہ ٹیکس کی نئی شرح 2.5 فیصد ہوگی۔

بعد میں یہ بات سامنے آئی کہ وفاقی کابینہ نے سرکاری ملازمین کی تنخواہوں میں حالیہ اضافے سے پیدا ہونے والے ’مالی بوجھ‘ کو کم کرنے کے لیے بجٹ پیش کرنے سے قبل انکم ٹیکس کی شرح میں 2.5 فیصد تک اضافے کی منظوری دے دی تھی۔

ادھر چیئرمین ایف بی آر نے بھی پارلیمانی کمیٹی کےایک اجلاس میں کہا تھا کہ ماہانہ ایک لاکھ کی آمدن پر ملازمت پیشہ شخص کو ایک ہزار روپے ٹیکس ادا کرنے پڑے گا۔

وزیراعظم شہباز شریف نے سرکاری ٹی وی پر نشر ہونے والے کابینہ اجلاس سے خطاب کرتے ہوئے وفاقی بجٹ میں دفاع کے لیے مختص بجٹ میں اضافے کا بھر پور دفاع کیا، انہوں نے علاقائی تنازعات میں روز بروز اضافے کے پیش نظر مسلح افواج کے لیے جدید جنگی ساز و سامان کی ضرورت پر بھی زور دیا۔

ایران-اسرائیل جنگ کی وجہ سے علاقائی صورتحال کو انتہائی تشویشناک قرار دیتے ہوئے وزیراعظم نے خبردار کیا کہ یہ بحران خطے اور عالمی امن کے لیے خطرہ بن سکتا ہے۔

انہوں نے اسرائیلی جارحیت کے خلاف ایران اور اس کے عوام کے ساتھ بھرپور یکجہتی کا اعادہ کیا اور بین الاقوامی برادری کو دونوں ممالک کے درمیان جنگ بندی کو فوری روکنے کے لیے اقدامات اٹھانے کی بھی درخواست کی۔

کابینہ اجلاس کے دوران وزیراعظم نے بتایا کہ نئے بجٹ میں پبلک سیکٹر ڈیولپمنٹ پروگرام کو ایک ہزار ارب روپے تک بڑھا دیا گیا ہے، شہباز شریف نے اہداف کو حاصل کرنے کا بھی عہد کیا۔

وفاقی حکومت نے حال ہی میں مالی سال 26-2025 کا بجٹ پیش کیا ہے اور اب یہ پارلیمنٹ کے دونوں ایوانوں سے منظور ہونے سے قبل سینیٹ اور قومی اسمبلی کی مختلف کمیٹیوں میں شق بہ شق زیر غور ہے، حکومت نے اگلے مالی سال کے لیے 12 کھرب 90 ارب روپے کا دفاعی بجٹ تجویز کیا ہے جو کہ گزشتہ سال کے مقابلے میں 11.8 فیصد زیادہ ہے۔

وزیراعظم شہباز شریف نے خطاب کے دوران کہا کہ دہشت گردی کے خلاف جنگ میں مصروف مسلح افواج کی ضروریات کو مد نظر رکھتے ہوئے دفاعی بجٹ میں اضافہ کیا گیا ہے، انہوں نے کہا کہ بھارت کے خلاف تنازع میں پاک افواج نے 24 کروڑ عوام کی حمایت سے شاندار کامیابی حاصل کی، یہ کارنامہ مسلح افواج کی پیشہ ورانہ صلاحیتوں کا منہ بولتا ثبوت ہے۔

انہوں نے ایران کے ساتھ پاکستان کی غیرمتزلزل یکجہتی کے عزم کا اظہار کرتے ہوئے کہا کہ بین الاقوامی برادری فوری طور پر سیز فائر کروانے اور اسرائیل کو مزید جارحیت دکھانے سے روکے۔

شہباز شریف نے کابینہ ارکان کو بتایا کہ ان کی ایرانی صدر مسعود پزشکیان اور ترکیہ کے صدر رجب طیب اردوان سے بھی اس حوالے سے تفصیلی بات چیت ہوئی ہے۔

وزیراعظم پاکستان نے غزہ کے موجودہ صورتحال کو انتہائی تکلیف دہ قرار دیتے ہوئےکہا کہ 50 ہزار سے زائد فلسطینیوں کو بے دردی کے ساتھ شہید کر دیا گیا ہے، غزہ میں ظلم و بربریت جاری ہے، دنیا کا ضمیر کب جاگے گا؟

انہوں نے کابینہ کو بتایا کہ نائب وزیراعظم اسحٰق ڈار 21 اور 22 جون کو ترکیہ میں شیڈول اسلامی تعاون تنظیم (او آئی سی) کے وزارئے خارجہ اجلاس میں پاکستان کی نمائندگی کریں گے۔

معاشی صورتحال پر بات کرتے ہوئے وزیراعظم شہباز شریف نے کہا کہ ہم نے آئی ایم ایف کو زرعی شعبے بشمول کھاد اور کیڑے مار ادویات پر ٹیکس نہ لگانے پر قائل کر لیا ہے، کسان پہلے ہی مشکلات کا شکار ہیں، حکومتی مؤقف کو تسلیم کرنے پر آئی ایم ایف کے شکر گزار ہیں۔

شہباز شریف نے پاکستان تحریک انصاف کا نام لیے بغیر کہا کہ موجودہ حکومت ان لوگوں کی طرح نہیں، جنہوں نے اپنے وعدوں پر عمل درآمد نہیں کیا اور ملک کو دیوالیہ کے قریب لے آئے تھے، ہماری حکومت معاشی صورتحال پر قابو پاتے ہوئے پاکستان کو معاشی طور پر مضبوط بنانے کے راستے پر گامزن ہے۔

وزیراعظم نے چیئرمین پاکستان پیپلزپارٹی (پی پی پی) بلاول بھٹو زرداری کی زیر قیادت وفد کی جانب سے بھارت جارحیت کے خلاف یورپ اور امریکا میں پاکستان کا مقدمہ شاندار انداز میں پیش کرنے پر تعریف کی۔

بجلی کے شعبے میں اصلاحات

دوران اجلاس وفاقی کابینہ نے بجلی کے شعبے کو مستحکم بنانے کے لیے پاکستان کے سب سے بڑے مالیاتی منصوبے کو منظوری دے دی، جس کے تحت اگلے 6 سال میں 12 کھرب 75 روپے کے گردشی قرضوں کو ختم کیا جائے گا، جس کا قومی بجٹ پر کوئی اضافی بوجھ نہیں پڑے گا۔

منصوبے کے تحت پاور ہولڈنگ کمپنی کے 683 ارب روپے کے قرضے کو ری فنانس کیا جائے گا جب کہ آزاد پاور پروڈیوسرز (آئی پی پیز) کو بقایاجات کی ادائیگیاں کی جائیں گی۔ اسکیم کا مقصد پائیدار اصلاحات کا نفاظ، مالی دباؤ کم کرنا اور توانائی کے شعبے میں سرمایہ کاروں کے اعتماد کو بحال کرنا ہے۔

وزیراعظم نے فیلڈ مارشل عاصم منیر کی امریکا میں پاکستانی کمیونٹی سے خطاب کی تعریف کرتے ہوئے کہا کہ پاکستانی مفادات کے تحفظ کے لیے فیلڈ مارشل کا عزم قومی فخر کا باعث ہے۔

کابینہ نے ’عوام دوست بجٹ‘ پیش کرنے پر وزیر خزانہ محمد اورنگزیب اور ان کی معاشی ٹیم کی تعریف کی، دوران اجلاس وفاقی وزیر مذہبی امور سردار یوسف کو حجاج کرام کے لیے بہترین انتظامات کرنے پر خراج تحسین پیش کیا گیا۔

کابینہ نے 21 مئی کو منعقدہ کابینہ کمیٹی برائے قانون سازی کے اجلاس میں کیے گئے فیصلوں کی بھی توثیق کی۔