بھارت کی جانب سے ویزے منسوخ کرنے کا بھارتی فیصلہ سنگین انسانی چیلنجز پیدا کر رہا ہے، ترجمان دفتر خارجہ

?️ 2 مئی 2025

اسلام آباد: (سچ خبریں) دفترخارجہ کے ترجمان شفقت علی خان کا کہنا ہے کہ ویزے منسوخ کرنے کا بھارتی فیصلہ سنگین انسانی چیلنجز پیدا کر رہا ہے،بھارت پھنسے پاکستانیوں کو فوری جانے کی اجازت دے، بھارت کی جانب سے ویزا منسوخی سے مسائل جنم لے رہے ہیں، کئی مریضوں کو بغیر علاج واپس آنا پڑ رہا ہے، اپنے ایک بیان میں ترجمان دفتر خارجہ نے کہا کہ واہگہ بارڈر پاکستانیوں کے لئے کھلا رہے گا۔

شفقت علی خان نے بتایا کہ 30 اپریل 2025 واہگہ اٹاری بارڈر سے واپسی کی آخری تاریخ تھی لیکن اٹاری میں پھنسے پاکستانی شہریوں کا میڈیا رپورٹس سے پتہ چلا۔انہوں نے کہا کہ بھارت کی جانب سے ویزا منسوخی سے کئی قسم کے مسائل جنم لے رہے ہیں۔ کئی مریضوں کو بغیر علاج بھارت سے واپس آنا پڑا، خاندانوں کے بچھڑنے اور بچوں کے والدین سے جدا ہونے کی اطلاعات بھی آرہی ہیں۔

ان کایہ بھی کہنا ہے کہ اگر ہندوستانی حکام انہیں سرحد پار کرنے کی اجازت دیتے ہیں تو ہم ان کے استقبال کیلئے تیار ہیں واہگہ بارڈر مستقبل میں بھی پاکستانی شہریوں کیلئے کھلا رہے گا۔یاد رہے کہ گزشتہ روزپہلگام فالس فلیگ آپریشن کے بعد بھی بھارت نے پاکستانی سفارتی عملے کو اٹاری بارڈر پر ہراساں کیاتھا۔پاکستانی ہائی کمیشن کا عملہ اٹاری بارڈر پہنچا تو بھارتی عملے نے پاسپورٹ لے لئے تھے۔

بھارتی فوج اور پولیس کی موجودگی میں میڈیا نے بھی پاکستانی سفارتی اہلکاروں سے بدتمیزی بھی کی تھی۔بھارت کی جانب سے علاج کیلئے بھارت جانے والے ذہنی معذور کو اٹاری بارڈر پر روک لیا گیا تھا دوسری طرف بھارتی سفارتی عملہ واہگہ بارڈر کے راستے واپس ہندوستان روانہ ہوگیا تھا۔کراچی گلستان جوہر کا رہائشی محمد ارشد جس کا 40 سال کا ذہنی معذور بیٹاعلاج کیلئے بھارت گیا تھا اس نے گزشتہ روزواپس آنا تھا لیکن اٹاری بارڈر پر بی ایس ایف والوں نے اسے پاکستان آنے سے روک دیا گیا تھا۔