بچوں کے جنسی استحصال میں ملوث بڑا نیٹ ورک پکڑ لیا۔ طلال چودھری

?️ 3 جون 2025

اسلام آباد (سچ خبریں) وزیرِ مملکت برائے داخلہ طلال چودھری نے کہا ہے کہ بچوں کے جنسی استحصال میں ملوث بڑا نیٹ ورک پکڑ لیا۔

تفصیلات کے مطابق وفاقی دارالحکومت میں ڈائریکٹر جنرل سائبر کرائم وقارالدین سید کے ساتھ پریس کانفرنس کرتے ہوئے طلال چودھری نے کہا ہے کہ پیکا ایکٹ کا مقصد کسی صحافی کی آواز کو دبانا نہیں ہے، پیکا ایکٹ وقت کی ضرورت ہے، وفاقی دارالحکومت میں ہم سوشل میڈیا کو ریگولیٹ کرنا چاہتے ہیں۔ انہوں نے کہا کہ جدید دور کے تقاضوں کے مطابق خود کو ہم آہنگ کرنا ہوگا، سائبر کرائم ونگ نے ایک بڑا نیٹ ورک پکڑا ہے، سائبر کرائم ونگ کا مقصد کسی کی آواز کو دبانا نہیں ہے، ہر ضلع میں سائبر کرائم ونگ کا دفتر بنانا چاہتے ہیں۔

ذرائع کے مطابق وزیرِ مملکت کا کہنا تھا کہ سائبرکرائم ونگ کو روزانہ کی بنیاد پر شکایات موصول ہورہی ہیں، سائبر کرائم ونگ نے ایک بڑا نیٹ ورک پکڑا ہے، گینگ مظفرآباد میں بچوں کے جنسی استحصال میں ملوث تھا، بچوں کی ویڈیوز کو ڈارک ویب پر بیچا جاتا تھا۔

ڈائریکٹر جنرل سائبر کرائم ونگ وقارالدین سید نے کہا کہ جرمن شہری سرغنہ ہے جس کی گرفتاری کے لیے اقدامات کیے جا رہے ہیں، بچوں کی ویڈیوز کو عالمی مارکیٹ میں بیچا جاتا ہے، اس دھندے میں ملوث ملزمان کے خلاف کارروائی کی جارہی ہے، ویڈیوز کو وٹس ایپ اور ٹیلی گرام کے ذریعے بھیجا جاتا تھا۔