اسلام کو انتہا پسندی سے جوڑنا لاعلمی ہے، پاکستان مذہبی رواداری کے فروغ کیلئے اپنی کوششیں جاری رکھے گا۔ صدر مملکت

?️ 14 مارچ 2026

اسلام آباد (سچ خبریں) اسلاموفوبیا کے تدارک کے عالمی دن پر صدر آصف علی زرداری اور وزیراعظم شہباز شریف نے پیغام میں مسلمانوں کے خلاف نفرت اور امتیازی سلوک کی مذمت کی، کہا اسلام کو انتہا پسندی سے جوڑنا لاعلمی ہے، پاکستان مذہبی رواداری کے فروغ کیلئے اپنی کوششیں جاری رکھے گا۔

اسلاموفوبیا کے تدارک کے عالمی دن پر صدر مملکت آصف علی زرداری نے اپنا پیغام جاری کیا ہے، صدر مملکت نے کہا کہ دنیا بھر میں مسلمانوں کے خلاف نفرت، امتیاز اور عدم برداشت کے رجحانات کے خلاف متحد ہونا ضروری ہے، آج کا دن مسلمانوں کےخلاف بڑھتے ہوئے تعصب اور تشدد کے واقعات کی جانب عالمی توجہ مبذول کراتا ہے۔ یہ دن مذہبی تنوع کے احترام اور رواداری کی اہمیت کو بھی اجاگر کرتا ہے۔

وزیراعظم شہباز شریف نے بھی اپنے پیغام میں کہا کہ مذہبی تعصب اور عدم برداشت معاشرتی ہم آہنگی کو کمزور کرتے ہیں، مہذب معاشرے عقائد کی بنیاد پر انسانی حقوق میں تفریق نہیں کرتے، پاکستان اسلاموفوبیا کی تمام صورتوں کی مذمت کرتا ہے۔

شہباز شریف نے کہا کہ اسلامی تعلیمات کے مطابق تمام انسان مساوی حقوق رکھتے ہیں۔ اسلام امن اور رواداری کا پیغام دیتا ہے۔ اسلام کو انتہا پسندی سے جوڑنا لاعلمی ہے جبکہ اقوام متحدہ کی قرارداد مسلمانوں کے خلاف نفرت انگیزی کی حوصلہ شکنی کرتی ہے۔

وزیراعظم نےکہا کہ پاکستان نے ہمیشہ عالمی فورمز پر اسلاموفوبیا کے خلاف آواز اٹھائی ہے ۔ مذہبی رواداری کے فروغ کیلئے کوششیں جاری رہیں گی۔