سچ خبریں: انسداد دہشت گردی عدالت (اے ٹی سی) لاہور نے سابق وفاقی وزراء فواد چوہدری اور اسد عمر کی حاضری معافی کی درخواست منظور کرلی۔
اے ٹی سی لاہور میں جج خالد ارشد نے جناح ہاؤس، تھانہ شادمان، اور عسکری ٹاور میں جلاؤ گھیراؤ اور توڑ پھوڑ کے مقدمات میں ضمانتوں پر سماعت کی۔
یہ بھی پڑھیں: فواد چوہدری کا پی ٹی آئی اور اسٹیبلشمنٹ کے مذاکرات پر حیرانی کا اظہار
سماعت کے دوران، عدالت نے حافظ فرحت عباس اور امتیاز محمود کی ضمانتیں عدم پیروی کی بنیاد پر خارج کردیں۔
عدالت نے فواد چوہدری، اسد عمر، مسرت جمشید، اور ان کے شوہر جمشید اقبال چیمہ کی حاضری معافی کی درخواستیں منظور کرلیں۔
جناح ہاؤس حملہ کیس میں 43 ملزمان کی ضمانتوں میں 7 ستمبر تک توسیع کی گئی، جبکہ تھانہ شادمان جلاؤ گھیراؤ کیس میں 11 ملزمان کی ضمانتوں میں 11 ستمبر تک توسیع دی گئی۔
مزید پڑھیں: فواد چوہدری کو بیرون ملک جانے کی عارضی اجازت اور ان کا ردعمل
زمان پارک کے سامنے جلاؤ گھیراؤ کیس میں ضمانتوں میں 12 ستمبر تک توسیع کی گئی، جبکہ عسکری ٹاور جلاؤ گھیراؤ کیس میں 17 ملزمان کی ضمانتوں میں 13 ستمبر تک توسیع دی گئی۔
ملزمان کے خلاف مقدمات تھانہ سرور روڈ، تھانہ شادمان، اور تھانہ گلبرگ میں درج ہیں۔
