سچ خبریں: امیر جماعت اسلامی حافظ نعیم الرحمان نے کہا ہے کہ حکومت کے فیصلے کا انتظار ہے، ورنہ یہ تحریک نیا رنگ دکھائے گی اور پورے ملک میں مکمل پہیہ جام کریں گے۔
راولپنڈی میں جماعت اسلامی کے دھرنے سے خطاب کرتے ہوئے حافظ نعیم الرحمان نے کہا کہ حکومتی اراکین ہمارے ساتھ بیٹھتے ہیں تو مطالبات سے اتفاق کرتے ہیں، لیکن میڈیا کے سامنے کہتے ہیں مطالبات درست ہیں مگر ممکن نہیں۔ حکومت جتنا وقت لینا چاہتی ہے لے لے، ہم یہاں موجود ہیں۔
یہ بھی پڑھیں: جماعت اسلامی کا حکومت پر ڈبل کھیل کھیلنے کا الزام
حافظ نعیم الرحمان نے مزید کہا کہ سمدھی، بھتیجی، چاچا سب سن لیں، ہم یہاں سے جانے والے نہیں ہیں۔ کراچی میں بھی دھرنا شروع ہونے والا ہے۔
انہوں نے کہا کہ ہم نے امن اور نئے سیاسی کلچر کی خاطر فیصلہ کیا ہے۔ آج 7ویں روز ہے اور ہم پوری قوت کے ساتھ مری روڈ پر موجود ہیں۔
امیر جماعت اسلامی نے کہا کہ اگر سیاسی جماعتیں دھرنے کی حمایت نہیں کریں گی تو عوام ان سے حساب لیں گے۔
اگر مطالبات منظور نہ کیے گئے تو ہم نے مارچ کا فیصلہ کرنا ہے۔ شہباز اور زرداری صاحب! پاک ایران گیس پائپ لائن پر کیوں کام نہیں ہو رہا ہے؟ کیا امریکہ کہتا ہے کہ ایران سے گیس نہیں لینی؟
انہوں نے کہا کہ خیبر پختونخوا کو دہشت گردوں کی آماجگاہ بنا دیا گیا ہے۔
مزید پڑھیں: جماعت اسلامی کے دھرنے کے بارے میں بانی پی ٹی آئی کا بیان
حافظ نعیم الرحمان نے یہ بھی کہا کہ وزارت خارجہ کی جانب سے اسرائیل کی مذمت کا خیر مقدم کرتے ہیں۔ اسرائیل نے جنگی جرائم، خواتین اور بچوں کا قتل عام کیا ہے۔ اسماعیل ہنیہ کی شہادت پر پوری دنیا سوگوار ہے۔
انہوں نے مزید کہا کہ امریکہ اور اسرائیل کا غرور حماس نے خاک میں ملا دیا ہے۔
