2024 میں بانی پی ٹی آئی کی ڈیل فائنل ہوچکی تھی۔ اختیار ولی

?️ 20 فروری 2026

اسلام آباد (سچ خبریں) کوآرڈنیٹر وزیراعظم اختیار ولی خان نے دعویٰ کرتے ہوئے کہا ہے کہ 2024 میں بانی پی ٹی آئی کی ڈیل فائنل ہوچکی تھی۔

اختیارولی خان کا کہنا تھا کہ رانا ثنا اللہ نے دو ڈیل کا ذکر کیا میں نے تین ڈیلوں کا کہا ہے جب کہ فیصل واوڈا کی کسی بات پر تبصرہ نہیں کرنا چاہتا۔ اُنہوں نے کہا کہ فیصل واوڈا کا بیگانی شادی میں عبداللہ والا رول ہے، اگر فیصل واوڈا ایسا نہیں کریں گے تو میڈیا میں کیسے ان رہیں گے، آج تک یہ معلوم نہیں فیصل واوڈا کی پارٹی کونسی اور کس کی ترجمانی کرتے ہیں۔

کوآرڈنیٹر وزیراعظم کا کہنا تھا کہ فیصل واوڈا کو ہر پارٹی سمجھتی ہے کہ ہمارا بچہ ہے، فیصل واوڈا کا ہماری پارٹی سے کوئی تعلق نہیں ہے، 2024 میں بانی پی ٹی آئی کی ڈیل فائنل ہو گئی تھی، بانی پی ٹی آئی کی طرف سے علی امین گنڈا پور، بیرسٹر گوہر، بیرسٹر سیف لیڈ کر رہے تھے۔

اختیار ولی خان نے الزام عائد کرتے ہوئے کہا کہ اس ڈیل میں کچھ حد تک شیرافضل مروت بھی شامل ہوئے تھے، حکومت کی طرف سے محسن نقوی نمائندگی کر رہے تھے، ڈیل تقریبا فائنل ہو چکی تھی لیکن جمعہ کا دن آگیا تھا۔ اُن کا مزید کہنا تھا کہ بانی پی ٹی آئی چاہتے تھے کہ انہیں دو دن انتظار کے بجائے صبح ہی بنی گالہ یا نتھیا گلی شفٹ کردیا جائے۔