ٹک ٹاک نے بچوں کی حفاظت اور کریئیٹرز کی سہولت کیلئے نئے فیچرز متعارف کرا دیے

?️ 30 جولائی 2025

سچ خبریں: مشہور ویڈیو شیئرنگ ایپ ٹک ٹاک نے بچوں کی آن لائن حفاظت کو بہتر بنانے اور کریئیٹرز کے تجربے کو محفوظ و آسان بنانے کے لیے کئی نئے فیچرز متعارف کرائے ہیں۔

ٹیکنالوجی ویب سائٹ کے مطابق، ٹک ٹاک نے کئی نئے فیچرز متعارف کروانے کا اعلان کیا ہے جن میں والدین کے لیے مزید کنٹرول اور کریئیٹرز کے لیے نئے ٹولز شامل ہیں۔

متعارف کرائے گئے نئے فیچرز میں ٹک ٹاک نے والدین کو یہ سہولت دی ہے کہ وہ اپنے بچوں کے اکاؤنٹ سے مخصوص افراد کو بلاک کر سکیں گے، بلاک کیے گئے افراد نہ تو ان کے بچے سے رابطہ کر سکیں گے اور نہ ہی ان کا مواد بچے کی نیوز فیڈ میں نظر آئے گا۔

ساتھ ہی، والدین کو اس فیچر کے ذریعے اس وقت خودکار طور پر اطلاع ملے گی جب ان کا بچہ کوئی پبلک ویڈیو، اسٹوری یا تصویر اپلوڈ کرے گا، اس فیچر کا مقصد والدین کو بچوں کی آن لائن سرگرمیوں سے باخبر رکھنا ہے۔

علاوہ ازیں، والدین کو اب یہ بھی دیکھنے کی سہولت ملے گی کہ ان کے 16 یا 17 سالہ بچے نے اپنی ویڈیوز کے ڈاؤن لوڈ کی اجازت دی ہے یا نہیں اور ان کی فالوونگ لسٹ دوسروں کو نظر آ رہی ہے یا نہیں۔

ٹک ٹاک نے ’کریئیٹر کیئر موڈ‘ کے نام سے ایک نیا فیچر بھی متعارف کروایا ہے جو نازیبا، نامناسب یا غیر اخلاقی تبصروں کو خودکار طریقے سے فلٹر کر دے گا، اس میں ان صارفین کے تبصرے بھی فلٹر ہوں گے جن کی باتیں اکثر رپورٹ، ناپسند یا حذف کی جاتی ہیں۔

ٹک ٹاک کا کہنا ہے کہ یہ فیچر مصنوعی ذہانت (اے آئی) کے ذریعے یہ سمجھتا ہے کہ کریئیٹرز کس قسم کے تبصرے بلاک یا ڈیلیٹ کرتے ہیں اور انہی اقسام کے تبصرے آئندہ کم دکھائے جائیں گے۔

اس کے علاوہ، ٹک ٹاک لائیو کے لیے ایک نیا فیچر متعارف کروایا گیا ہے، جس کے ذریعے سے کریئیٹرز کسی مخصوص لفظ کو تبصروں سے مکمل طور پر بلاک کر سکتے ہیں۔

ایسے صارفین جنہوں نے یہ لفظ پہلے بھی استعمال کیا ہو یا آئندہ کریں، انہیں مقررہ وقت کے لیے خاموش کر دیا جائے گا۔