ہمیں بے مثال مہنگائی ورثے میں ملی ہے: ٹرمپ

سچ خبریں: امریکی صدر ڈونلڈ ٹرمپ نے کانگریس کے مشترکہ اجلاس سے خطاب کرتے ہوئے زوردار انداز میں دعویٰ کیا کہ ان کی انتظامیہ نے ملک کو بدترین صورتحال سے سنبھال کر ایک تاریخی تبدیلی لائی ہے۔

 انہوں نے کہا کہ وہ بائیڈن انتظامیہ سے بے مثال مہنگائی، کھلی سرحدیں اور تباہ حال معیشت وراثت میں لے کر آئے ہیں۔

صدر ٹرمپ نے اپنے خطاب کا آغاز یہ کہہ کر کیا کہ اب سے پانچ ماہ سے بھی کم عرصے میں ہمارا ملک یومِ آزادی منائے گا۔ انہوں نے مزید کہا کہ آج ہماری سرحدیں محفوظ ہیں، ہم بہتر سے بہتر نتائج حاصل کریں گے اور یہ ریاست ہائے متحدہ امریکہ کا سنہری دور ہے۔

انہوں نے سابق صدر جو بائیڈن اور کانگریس میں ان کے اتحادیوں کو شدید تنقید کا نشانہ بناتے ہوئے کہا کہ انہوں نے بدترین افراط زر کی تباہی جنم دی۔ تاہم انہوں نے فخر کا اظہار کرتے ہوئے کہا کہ اقتدار سنبھالنے کے ایک سال کے اندر ہی انہوں نے "تاریخی انقلاب” برپا کر دیا ہے۔ ان کا کہنا تھا، "کچھ عرصہ پہلے تک ہم ایک مردہ ملک تھے اور آج ہم دنیا کا سب سے پرکشش ملک ہیں۔

امریکی صدر نے اپنی اقتصادی پالیسیوں کو کامیاب قرار دیتے ہوئے بتایا کہ انہیں 12 ماہ کے دوران دنیا بھر سے 18 ٹریلین ڈالر سے زائد کے وعدے موصول ہوئے ہیں۔ انہوں نے روزگار کے حوالے سے دعویٰ کیا کہ آج امریکہ کی تاریخ میں سب سے زیادہ افراد ملازمتوں سے منسلک ہیں۔ تیل کی پیداوار میں 600 ہزار بیرل یومیہ اضافے کا ذکر کرتے ہوئے انہوں نے وینزویلا سے 80 ملین بیرل تیل کی فراہمی کو بھی اجاگر کیا۔

ٹرمپ نے قانون نافذ کرنے والے اداروں کی کارکردگی کو سراہتے ہوئے کہا کہ گزشتہ سال قتل کی شرح میں سب سے زیادہ کمی ریکارڈ کی گئی، جو 125 سال سے زائد عرصے میں اپنی کم ترین سطح پر ہے۔ ان کے مطابق واشنگٹن ڈی سی اب امریکہ کے محفوظ ترین شہروں میں سے ایک ہے۔

اپنے خطاب میں صدر ٹرمپ نے تارکین وطن کے معاملے پر سخت گیر موقف دہرایا۔ انہوں نے دعویٰ کیا کہ گزشتہ 9 ماہ کے دوران ایک بھی غیر قانونی تارکین وطن ملک میں داخل نہیں ہوا۔ ان کا کہنا تھا کہ امریکی حکومت کا فرض شہریوں کا تحفظ ہے، غیر قانونی تارکین وطن کا نہیں۔

انہوں نے کانگریس پر زور دیا کہ وہ ایک ایسا بل منظور کرے جو غیر قانونی تارکین وطن کو انتخابات میں ووٹ ڈالنے سے روکے۔ ڈیموکریٹس پر تنقید کرتے ہوئے انہوں نے کہا کہ وہ ووٹر شناختی کارڈ کی مخالفت کرکے انتخابات میں دھاندلی چاہتے ہیں۔ ان کا الزام تھا کہ امریکہ میں انتخابی دھوکہ دہی بہت وسیع پیمانے پر ہو رہی ہے۔

خارجہ پالیسی پر گفتگو کرتے ہوئے ٹرمپ نے دعویٰ کیا کہ انہوں نے اپنے 10 ماہ کی صدارت میں غزہ سمیت 8 جنگیں ختم کر دیں۔ یوکرین جنگ کے بارے میں ان کا کہنا تھا کہ وہ اسے ختم کرنے کی بھرپور کوشش کر رہے ہیں۔

حماس اور اسرائیل کے درمیان یرغمالیوں کے تبادلے کا ذکر کرتے ہوئے انہوں نے کہا کہ غزہ میں جنگ بندی کے معاہدے کے تحت تمام زندہ اور مردہ یرغمالیوں کو واپس لایا گیا ہے۔