سچ خبریں:افغانستان کے قائم مقام وزیر خارجہ امیر خان متقی نے کہاکہ طالبان حکومت نے تسلیم کرنے کے لیے تمام شرائط پوری کی ہیں،اب دنیا کو انھیں تسلیم کرنا چاہیے۔
طلوع نیوزکی رپورٹ کے مطابق امیر خان متقی نے جمعے کو ترکی میں انطالیہ اسمبلی کے تین روزہ اجلاس کے آغاز میں طالبان کو تسلیم کرنے پر زور دیتے ہوئے کہا کہ افغانستان کے اثاثے جاری کیے جائیں اور ان کے ساتھ بات چیت کی جائے کیونکہ یہ افغانوں کا حق ہے۔
واضح رہے کہ امیر خان متقی کا یہ تبصرہ ایسے وقت میں آیا ہے جب ترکی میں انطالیہ اسمبلی کا اجلاس منعقد ہوا جس میں عالمی وزرائے خارجہ اور بین الاقوامی تنظیموں کے نمائندوں نے شرکت کی جو اتوار تک جاری رہے گا، اگرچہ اجلاس میں یوکرین روس جنگ پر توجہ مرکوز کی گئی تاہم افغانستان پر بات چیت بھی اجلاس کا حصہ ہے۔
قابل ذکر ہے کہ اس اجلاس میں طالبان کے قائم مقام وزیر خارجہ امیر خان متقی افغانستان کے مسائل اور افغانستان کے ساتھ عالمی تعلقات پر بات چیت کریں گے جبکہ طالبان وفد نے قطری حکام اور افغانستان میں امریکی سفیر سے بھی ملاقات کی ہے۔
درایں اثنا افغان وزارت خارجہ کے نائب ترجمان ضیا احمد تکل نے کہاکہ اس ملاقات میں امارت اسلامیہ کے نظام کو تسلیم کرنے، اقتصادی ترقی اور سیاسی تعلقات کی توسیع سمیت مختلف امور پر تبادلہ خیال کیا گیا،یادرہے کہ جنگ اور امن کی قیمت، ایک غیر مستحکم دور میں قیادت اور امن اور خوشحالی کے لیے بہتر سفارت کاری کے لیے علاقائی اور عالمی راستے انطالیہ اسمبلی کے تین روزہ اجلاس میں زیرِ بحث آنے والے اہم ترین موضوعات میں شامل ہیں۔
