سچ خبریں:سعودی وزیر خارجہ نے میڈیا کے ان دعوؤں کی تردید کی کہ اردن میں ایرانی اور سعودی ماہرین کے درمیان سکیورٹی میٹنگ ہو رہی ہے۔
رشیا ٹوڈے کی رپورٹ کے مطابق سعودی وزیر خارجہ فیصل بن فرحان نے اردن میں سکیورٹی اجلاس کے موقع پر اپنے ملک کے اور ایرانی سکیورٹی ماہرین کےدرمیان خفیہ ملاقات کی تردید کی ہے،رپورٹ کے مطابق بن فرحان نے قاہرہ میں اپنے مصری ہم منصب سامح شکری کے ساتھ مشترکہ نیوز کانفرنس میں کہا کہ اردن میں سعودی اور ایرانی ماہرین کے درمیان کوئی ملاقات نہیں ہوئی۔
انہوں نے یہ بھی تسلیم کیا کہ اردن نے حال ہی میں ایک سیکورٹی کانفرنس کی میزبانی کی تھی جس میں دنیا بھر سے کئی لوگوں نے شرکت کی تھی، انہوں نے کہا کہ سعودی عرب کسی بھی بات چیت کا خیرمقدم کرتا ہے، انہوں نے کہا کہ تہران اور ریاض کے درمیان براہ راست مذاکرات کا سلسلہ جاری ہے، جس کا سرکاری طور پر پہلے ہی اعلان کیا جا چکا ہے۔
یادرہے کہ اردن کی سرکاری خبر رساں ایجنسی (پیٹرا) نے چند روز قبل دعویٰ کیا تھا کہ عمان میں ایرانی اور سعودی حکام کے درمیان ماہرین کی سطح کی سکیورٹی میٹنگ ہوئی ہے، ذرائع کے مطابق اس ملاقات کی میزبانی عمان میں عرب انسٹی ٹیوٹ فار سکیورٹی ریسرچ نے کی جس میں دونوں فریقین نے متعدد سکیورٹی اور تکنیکی امور پر تبادلہ خیال کیا اور فریقین نے تعلقات کو وسعت دینے اور علاقائی استحکام کو مضبوط بنانے کی خواہش کا اظہار کیا۔
دریں اثنا برطانوی خبر رساں ایجنسی نے پیر کے روز ایران میں ایک سینئر سفارتی ذریعے کا حوالہ دیتے ہوئے پیٹرا نیوز ایجنسی کے دعوے کی تردید کی اور بتایا کہ کسی بھی ایرانی عہدہ دار نے اس اجلاس میں شرکت نہیں کی۔