ٹرمپ انتظامیہ کی ونزوئلا پر سخت کارروائیاں خاندانی پابندیوں کے بعد تیل بردار جہاز بھی ضبط

?️ 12 دسمبر 2025

ٹرمپ انتظامیہ کی ونزوئلا پر سخت کارروائیاں خاندانی پابندیوں کے بعد تیل بردار جہاز بھی ضبط

واشنگٹن اور کاراکاس کے درمیان کشیدگی حالیہ دنوں میں اُس وقت شدید ہو گئی جب امریکہ نے ونزوئلا کے صدر نکولاس مادورو کے اہلِ خانہ پر نئی پابندیاں عائد کیں اور اس کے بعد ونزوئلا کا ایک تیل بردار جہاز ضبط کر لیا۔ یہ اقدامات عالمی سطح پر وسیع ردعمل کا سبب بنے ہیں۔

دنیا کے معتبر امریکی جریدے، نیویارک ٹائمز کے مطابق، صدر ڈونلڈ ٹرمپ نے تازہ ترین قدم کے طور پر مادورو کے چار رشتہ داروں کے علاوہ ونزوئلا کی تیل برداری سے وابستہ چھ جہاز رانی کمپنیوں پر بھی پابندیاں لگا دیں۔

اسی دوران امریکہ نے بدھ کے روز کیریبین میں ونزوئلا کا ایک تیل بردار جہاز ضبط کر لیا، جسے سمندری ذرائع نے اسکیپر کے نام سے شناخت کیا تھا۔ اس اقدام نے عالمی منڈی میں تیل کی قیمتوں پر فوری اثر ڈالا۔ ٹرمپ نے اس ضبطی کی تصدیق کرتے ہوئے کہا کہ مزید اقدامات بھی جاری ہیں۔

مادورو نے اس واقعے پر ردعمل دیتے ہوئے کہا کہ کیریبین میں امریکہ کی مجرمانہ بحری قزاقی کا نیا دور شروع ہو گیا ہے۔ ونزوئلا کی وزارتِ خارجہ نے بھی اس اقدام کی سخت مذمت کرتے ہوئے کہا کہ یہ کوئی واحد واقعه نہیں بلکہ واشنگٹن کی کاراکاس کے خلاف جارحانہ اور منصوبہ بند پالیسی کا حصہ ہے۔

یہ پیش رفت ایسے وقت میں ہوئی ہے جب ٹرمپ نے حالیہ ہفتوں میں مادورو کے خلاف اپنی زبان مزید سخت کر دی ہے اور یہاں تک کہ ونزوئلا پر زمینی حملے کے امکان کو بھی رد نہیں کیا۔

دوسری طرف روس کے صدر ولادیمیر پوتین نے تازہ کشیدگی کے بعد مادورو سے ٹیلی فون پر رابطہ کرکے یقین دلایا کہ ماسکو اس معاملے میں کاراکاس کے ساتھ کھڑا ہے۔

کشیدگی میں اس وقت مزید اضافہ ہوا جب واشنگٹن نے اگست سے منشیات کی اسمگلنگ کے خلاف کارروائی کے نام پر ونزوئلا کے ساحل پر جنگی بحری جہاز، آبدوزیں، فوجی طیارے اور مسلح دستے تعینات کر دیے۔ اطلاعات کے مطابق امریکہ کا تقریباً ایک تہائی بحری بیڑہ اس خطے میں موجود ہے۔ کیریبین اور بحرِ اوقیانوس میں مشتبہ منشیات بردار کشتیوں پر امریکی حملوں میں اب تک 84 سے زائد افراد مارے جا چکے ہیں۔

امریکہ نے 24 نومبر کو بغیر کسی ثبوت کے کارتل دے لوس سولس نامی ایک مبینہ گروہ کو غیر ملکی دہشت گرد تنظیم قرار دے کر اس پر پابندیاں عائد کر دیں۔ واشنگٹن کا دعویٰ ہے کہ یہ گروہ مادورو اور اُن کے قریبی عہدے داروں کے زیرِ اثر ہے، جبکہ ونزوئلا نے اس دعوے کو مضحکہ خیز جھوٹ اور داخلی امور میں مداخلت کا بہانہ قرار دیا ہے۔

ٹرمپ نے ہفتے کے روز سوشل میڈیا پلیٹ فارم ٹروتھ سوشل پر غیر متوقع پیغام میں اعلان کیا کہ ونزوئلا کی فضائی حدود اور اس کے اطراف کو “مکمل طور پر بند” تصور کیا جائے۔ انہوں نے ایئرلائنز، پائلٹس اور منشیات یا انسانوں کے اسمگلروں کو خبردار کیا کہ وہ اس علاقے میں پروازوں سے گریز کریں۔ اس بیان کے چند گھنٹوں بعد پروازوں کی نگرانی کرنے والی ویب سائٹ “فلائٹ ٹریکر” نے دکھایا کہ ونزوئلا جانے والی پروازوں کو معطل کر دیا گیا اور ملک کا فضائی راستہ خالی ہو گیا۔

بعد ازاں ٹرمپ نے نیویارک ٹائمز اور وال اسٹریٹ جرنل کی ان رپورٹس کی تصدیق کی کہ ان کی مادورو سے ٹیلی فون پر بات ہوئی تھی، تاہم انہوں نے اس گفتگو کی تفصیلات بتانے سے انکار کر دیا۔

ان سے جب پوچھا گیا کہ کیا اُن کا فضائی حدود بند کرنے کا اعلان ممکنہ امریکی حملے کا اشارہ ہے، تو انہوں نے کہا کہ ایسا تاثر نہ لیا جائے۔

امریکی دفاعی جریدے “پولیٹیکو” نے ایک اعلیٰ دفاعی اہلکار کے حوالے سے لکھا کہ خطے میں امریکہ کی زمینی فوجی موجودگی انتہائی محدود ہے اور کسی بڑے حملے کے لیے درکار ہزاروں فوجیوں کی نقل و حرکت فوری طور پر ممکن نہیں۔ رپورٹ کے مطابق سابق میرین کرنل مارک کانسیان نے کہا کہ ونزوئلا پر بڑے حملے کے لیے کم از کم پچاس ہزار فوج درکار ہے، جبکہ امریکہ کے پاس خطے میں صرف 2200 میرین موجود ہیں اور کسی بڑی عسکری نقل و حرکت کے کوئی آثار نہیں۔