وائٹ ہاؤس دنیا کو مہنگی امریکی توانائی خریدنے پر مجبور کر رہا ہے:کریملن کا انتباہ

وائٹ ہاؤس دنیا کو مہنگی امریکی توانائی خریدنے پر مجبور کر رہا ہے:کریملن کا انتباہ

روسی صدارتی دفتر کریملن کے ترجمان دیمتری پسکوف نے امریکہ پر الزام لگایا ہے کہ وہ دنیا بھر کے ممالک کو مجبور کرنا چاہتا ہے کہ وہ امریکی تیل اور مائع گیس (LNG) مہنگے داموں خریدیں۔

پسکوف نے روسی خبر رساں ادارے آر بی کے کو انٹرویو دیتے ہوئے کہا کہ امریکی صدر ڈونلڈ ٹرمپ بنیادی طور پر ایک تاجر ہیں اور پوری دنیا کو اس بات پر مجبور کرنا چاہتے ہیں کہ وہ توانائی کے وسائل صرف امریکہ سے اور بلند قیمتوں پر خریدیں۔

انہوں نے کہا: امریکہ اس حکمت عملی میں کافی حد تک کامیاب رہا ہے۔ یورپ کے کئی ممالک پہلے ہی زیادہ قیمت پر امریکی مائع گیس خرید رہے ہیں۔

کریملن ترجمان نے وضاحت کی کہ یورپ اب روس کے لیے کوئی خصوصی منڈی نہیں رہا، کیونکہ ماسکو نے اپنی توانائی کی برآمدات کو دوسری منڈیوں کی طرف موڑ دیا ہے اور مغربی دباؤ اور پابندیوں کے باوجود معیشت کو مستحکم رکھنے میں کامیاب رہا ہے۔

پسکوف نے ٹرمپ کے اس بیان پر بھی ردعمل دیا جس میں انہوں نے روس کو کاغذی شیر کہا تھا۔ پسکوف نے کہا:روس کاغذی شیر نہیں ہے۔ دنیا ہمیں ریچھ کی علامت سے جانتی ہے اور کاغذی ریچھ نام کی کوئی چیز نہیں ہوتی۔ روس ایک اصلی ریچھ ہے۔

کریملن ترجمان نے کہا کہ روس یوکرین میں اپنی خصوصی فوجی کارروائی جاری رکھے گا۔ ان کے مطابق یہ جنگ فیصلہ کن مرحلے میں ہے اور روس کو ہر صورت میں فتح حاصل کرنا ہوگی تاکہ آنے والی نسلوں کے لیے محفوظ مستقبل یقینی بنایا جا سکے۔

انہوں نے مزید کہا کہ صدر ولادیمیر پوتین بارہا اس جنگ کے بنیادی اسباب کو حل کرنے کی کوشش کر چکے ہیں، لیکن روس کے قومی مفادات کے تحفظ کے لیے ان مسائل کو جڑ سے ختم کرنا ضروری ہے۔

پسکوف نے اس بات پر بھی زور دیا کہ ماسکو واشنگٹن کے ساتھ تعلقات بہتر بنانا چاہتا ہے، تاہم امریکہ نے روس کے ساتھ کسی بھی تعاون کو یوکرین کے مسئلے سے مشروط کر رکھا ہے۔

انہوں نے کہا: امریکی مؤقف یہ ہے کہ پہلے یوکرین کا تنازع حل کیا جائے، پھر دیگر معاملات پر بات ہو۔ لیکن ہمارے نزدیک ان دونوں عملوں کو الگ الگ اور بیک وقت آگے بڑھانا زیادہ مفید ہے۔وائٹ ہاؤس دنیا کو مہنگی امریکی توانائی خریدنے پر مجبور کر رہا ہے