نوری المالکی کی وزارتِ عظمیٰ کے لیے نامزدگی داخلی معاملہ ہے:عراقی وزیر خارجہ

نوری المالکی کی وزارتِ عظمیٰ کے لیے نامزدگی داخلی معاملہ ہے:عراقی وزیر خارجہ

عراق کے وزیر خارجہ فؤاد حسین نے کہا ہے کہ نوری المالکی کی وزارتِ عظمیٰ کے لیے نامزدگی عراق کا داخلی معاملہ ہے، تاہم اس حوالے سے امریکہ کے مؤقف کا جائزہ لیا جائے گا۔

غیر ملکی نشریاتی ادارے کو دیے گئے انٹرویو میں فؤاد حسین کا کہنا تھا کہ انہیں امید ہے کہ صدارتی منصب کے لیے انہیں پارلیمان کی مختلف جماعتوں اور دھڑوں کی حمایت حاصل ہوگی۔

انہوں نے شدت پسند تنظیم داعش کے ارکان کو ان کے آبائی ممالک واپس بھیجنے کے معاملے پر کہا کہ بغداد حکومت عرب اور مغربی ممالک سے مسلسل رابطے میں ہے تاکہ وہ اپنے شہریوں کو واپس لے جائیں۔

ایران اور امریکہ کے درمیان جاری مذاکرات کے بارے میں عراقی وزیر خارجہ نے امید ظاہر کی کہ یہ بات چیت مثبت نتائج دے گی اور ایسا معاہدہ طے پائے گا جو دونوں ممالک اور پورے خطے کے مفاد میں ہو۔ انہوں نے کہا کہ مذاکرات کے تسلسل اور کامیابی کے لیے عالمی حمایت ضروری ہے۔

فؤاد حسین نے مزید بتایا کہ عمان ایران اور امریکہ کے درمیان ثالثی کا کردار ادا کر رہا ہے اور عراق اس حوالے سے عمان کے ساتھ رابطے میں ہے۔ ان کے بقول دونوں ممالک کے رہنماؤں کی ممکنہ ملاقات کی دعوت بھی مثبت پیش رفت ہے۔

یہ بیان ایسے وقت میں سامنے آیا ہے جب امریکہ کے صدر ڈونلڈ ٹرمپ نے چند روز قبل نوری المالکی کی دوبارہ وزارتِ عظمیٰ کی مخالفت کی تھی۔ ٹرمپ نے اپنے پیغام میں خبردار کیا تھا کہ اگر المالکی کو دوبارہ وزیر اعظم منتخب کیا گیا تو امریکہ عراق کی مالی امداد روک سکتا ہے۔

امریکی مؤقف پر عراق کے مختلف سیاسی حلقوں نے منفی ردعمل ظاہر کرتے ہوئے اسے بغداد کے داخلی امور میں کھلی مداخلت قرار دیا ہے۔