مغربی کنارے میں متعدد فلسطینی گرفتار

?️ 25 فروری 2023

سچ خبریں:خبر رساں ذرائع نے مغربی کنارے میں صیہونی حکومت کے ہاتھوں 22 فلسطینیوں کی گرفتاری کی خبر دی ہے۔

الجزیرہ نیوز چینل کی رپورٹ کے مطابق صہیونی فورسز نے مغربی کنارے کے شہروں الخلیل، نابلس، جنین اور بیت لحم میں چھاپے مار کر 22 افراد کو گرفتار کر لیا،اس سے قبل صہیونی پولیس نے اعلان کیا تھا کہ بیت المقدس میں فائرنگ کی کاروائی کے بعد انہوں نے 42 افراد کو گرفتار کیا ہے جن میں مذکورہ کاروائی کرنے والے افراد کے خاندان کے لوگ اور بیت المقدس کے شمال کے رہائشی بھی شامل ہیں۔

صہیونی چینل کان نے اعلان کیا ہے کہ اسرائیلی پولیس کے انسپکٹر جنرل نے کہا ہے کہ مقبوضہ علاقوں میں چوکسی بلند ترین سطح پر پہنچ گئی ہے جبکہ حال ہی میں صیہونی حکومت کے ترجمان نے اعلان کیا تھا کہ موجودہ حالات کے مطابق صیہونی حکومت نے مغربی کنارے میں اپنی افواج میں اضافہ کر دیا ہے۔

فلسطین کے شماریات اور اطلاعاتی مرکز نے حال ہی میں اعلان کیا ہے کہ فلسطینی مزاحمتی قوتوں نے مغربی کنارے میں صیہونیوں کے خلاف 27 کارروائیاں کی ہیں،اس رپورٹ کے مطابق یہ کارروائیاں جنین، قلقیلیہ، نابلس، طولکرم، بیت المقدس اور الخلیل میں صیہونی فوجیوں اور آباد کاروں کے خلاف کی گئیں،اس رپورٹ میں مزید کہا گیا ہے کہ فلسطینی مزاحمت کاروں نے مغربی کنارے کے مختلف علاقوں میں صیہونی فوجیوں پر گولیاں برسا کر اور دھماکہ خیز مواد پھینک کر ان کا مقابلہ کیا۔

واضح رہے کہ مقبوضہ علاقوں بالخصوص مغربی کنارے میں ان دنوں کے حالات بہت نازک ہیں اور فلسطینی مجاہدین صہیونیوں کے ان گنت جرائم کا کسی بھی طریقے سے جواب دیتے ہیں جس کی وجہ سے غاصب صیہونیوں کے لیے حالات کافی خراب ہوگئے ہیں۔

یاد رہے کہ اس سے پہلے صیہونی صرف مقبوضہ علاقوں کے جنوب میں اور غزہ کے علاقے میں فلسطینیوں کے ساتھ برسرپیکار تھے لیکن اب فلسطین کے مشرق میں واقع مغربی کنارے کے جوان بھی بزدل صیہونیوں کے لیے موت کا فرشتہ بن چکے ہیں جس نے ان کی نیندیں حرام کر دی ہیں۔