مغرب ڈالر کے ناجائز استعمال سے اپنے حریفوں کو دبانے کی کوشش کر رہا ہے:روسی وزیر خارجہ

مغرب ڈالر کے ناجائز استعمال سے اپنے حریفوں کو دبانے کی کوشش کر رہا ہے:روسی وزیر خارجہ

روسی وزیرِ خارجہ سرگئی لاوروف نے مغربی ممالک پر الزام لگایا ہے کہ وہ ڈالر کی عالمی حیثیت کو بطور ہتھیار استعمال کرتے ہوئے اپنے مخالفین کو کمزور کرنے اور عالمی برتری کو برقرار رکھنے کی کوشش کر رہے ہیں۔

خبر رساں ادارے تاس کے مطابق لاوروف نے کہا کہ مغرب ہر ممکن اقدام کر رہا ہے تاکہ ایک کثیر قطبی عالمی نظام ابھرنے نہ پائے اور وہ اپنے تاریخی تسلط کو قائم رکھ سکے۔

ان کا کہنا تھا کہ مغربی ممالک منصفانہ مقابلے اور مذاکرات کے بجائے دھمکیوں، دباؤ اور پابندیوں کا سہارا لیتے ہیں۔ مزید یہ کہ وہ ڈالر کے اثر و رسوخ کو استعمال کر کے دوسرے ملکوں کے خلاف تجارتی جنگیں چھیڑتے ہیں، جو کسی جائز اقتصادی یا سیاسی حق کے دفاع کے بجائے صرف حریفوں کو کچلنے کا طریقہ ہے۔

روسی وزیر خارجہ نے مزید زور دیا کہ آج یہ بات سب پر عیاں ہے کہ مغرب کے عالمی حریف نہ صرف مضبوط ہو رہے ہیں بلکہ کئی شعبوں میں مغرب سے آگے نکل چکے ہیں۔