مادورو کے مبینہ اغوا کو ایک ماہ گزرنے کے بعد وینزویلا میں احتجاج

مادورو کے مبینہ اغوا کو ایک ماہ گزرنے کے بعد وینزویلا میں احتجاج

وینزویلا کے صدر نیکولس مادورو کے مبینہ اغوا کو ایک ماہ گزرنے کے بعد ملک میں سیاسی کشیدگی بڑھ گئی ہے اور دارالحکومت کاراکاس سمیت مختلف شہروں میں سڑکوں پر احتجاجی مظاہرے شروع ہو گئے ہیں۔ حکومت کے حامی اور مخالف دونوں گروہ اپنی اپنی مطالبات کے حق میں سڑکوں پر نکل آئے ہیں۔

ترکی کے سرکاری نشریاتی ادارے ٹی آر ٹی کے مطابق، منگل کے روز کاراکاس کی سڑکیں متضاد سیاسی مظاہروں کا منظر پیش کرتی رہیں۔ ایک طرف حکمراں جماعت یونائیٹڈ سوشلسٹ پارٹی آف وینزویلا کے حامیوں نے ریلیاں نکالیں اور صدر مادورو کی وطن واپسی کا مطالبہ کیا، جبکہ دوسری جانب حکومت مخالف مظاہرین نے احتساب اور انصاف کا مطالبہ کیا۔

حکومت کے حامی مظاہرین، جنہیں پارٹی عہدیداروں نے منظم کیا تھا، نے صدر مادورو سے وفاداری کا اظہار کیا اور عبوری صدر ڈیلسی رودریگز کی حمایت کا اعلان کیا، جو 5 جنوری کو اقتدار میں آئیں۔ مظاہروں کے منتظمین کا کہنا تھا کہ وہ یقین رکھتے ہیں کہ آخرکار انصاف کی فتح ہوگی اور اسی مقصد کے لیے احتجاج جاری رکھا جائے گا۔ پارٹی رہنماؤں نے زور دیا کہ موجودہ حالات میں اتحاد ہی ملک کے استحکام کی ضمانت ہے۔

دوسری جانب، حکومت مخالف مظاہرین نے کاراکاس کے مختلف علاقوں میں اجتماعات منعقد کیے اور سیاسی جوابدہی اور شفافیت کا مطالبہ کیا۔

اقتدار سنبھالنے کے بعد، ڈیلسی رودریگز نے عام معافی کے قانون کی تجویز پیش کی ہے، جس کا مقصد 1999 سے قید سینکڑوں سیاسی قیدیوں کی رہائی ہے۔ انہوں نے بدنام زمانہ جیل ال ہیلیکوئید کو فوری طور پر بند کرنے کا بھی حکم دیا ہے۔

اسی دوران، امریکی صدر ڈونلڈ ٹرمپ نے منگل کو کہا کہ امریکہ اور وینزویلا کی عبوری حکومت کے درمیان تعاون بہتر ہو رہا ہے۔ ان کے مطابق تقریباً پچاس ملین بیرل وینزویلا کا تیل امریکہ کے شہر ہیوسٹن منتقل کیا جا رہا ہے۔ ٹرمپ نے کہا کہ واشنگٹن وینزویلا کی موجودہ حکومت کے ساتھ قریبی تعاون کر رہا ہے۔

واضح رہے کہ عبوری صدر ڈیلسی رودریگز کی حکومت نے اس سے قبل امریکہ کے ساتھ ایک نئے سفارتی عمل کے آغاز کا اعلان کیا تھا، جس کا مقصد دونوں ممالک کے سفارتی مشن دوبارہ کھولنا اور صدر مادورو اور ان کی اہلیہ کے مبینہ اغوا کے نتائج سے نمٹنا بتایا گیا تھا۔

ادھر امریکی وزیر خارجہ مارکو روبیو نے سینیٹ میں بیان دیتے ہوئے کہا ہے کہ ٹرمپ انتظامیہ کا حتمی مقصد وینزویلا میں ایک جمہوری نظام کا قیام ہے، جو آزاد اور منصفانہ انتخابات کے ذریعے ممکن ہوگا، تاہم ان کے مطابق یہ عمل مختصر نہیں بلکہ طویل المدت ہوگا۔