غزہ میں فضائی طور پر گرائے جانے والے امدادی پیکٹوں سے جاں بحق افراد کی تعداد میں اضافہ

?️ 10 اگست 2025

غزہ میں فضائی طور پر گرائے جانے والے امدادی پیکٹوں سے جاں بحق افراد کی تعداد میں اضافہ

غزہ کے سرکاری اطلاعاتی دفتر نے اطلاع دی ہے کہ فضائی طور پر گرائے گئے امدادی سامان کے نتیجے میں جاں بحق ہونے والوں کی تعداد بڑھ کر 23 ہو گئی ہے، جبکہ 124 افراد زخمی ہیں۔

الجزیرہ کے مطابق، غزہ کے سرکاری میڈیا نے بتایا کہ یہ ہلاکتیں اُس وقت سے جاری ہیں جب سے غزہ پر اسرائیلی نسل کشی کی مہم شروع ہوئی۔ بیشتر امدادی پیکٹ ان علاقوں میں گرے ہیں جو اسرائیلی فوج کے قبضے میں ہیں یا جہاں کے مکینوں کو جبراً نکالا گیا ہے۔ ان علاقوں میں جانے والے افراد کو نشانہ بنائے جانے کا خطرہ رہتا ہے۔ ماضی میں بھی امدادی پیکٹوں کے سمندر میں گرنے سے 13 شہری جاں بحق ہوئے تھے، اور بعض اوقات یہ پیکٹ شہری آبادی کے بیچ گر کر مزید خطرہ پیدا کرتے ہیں۔

غزہ کے سرکاری میڈیا نے اس طریقۂ امداد کو خطرناک قرار دیتے ہوئے زور دیا ہے کہ امداد محفوظ طریقے سے اور مناسب مقدار میں زمینی راستوں کے ذریعے بھیجی جائے۔ بیان میں کہا گیا کہ ہم بھوک اور افراتفری کی پالیسی کی مذمت کرتے ہیں اور اس کے لیے مکمل طور پر قابض اسرائیلی حکومت اور امریکہ کو ذمہ دار ٹھہراتے ہیں۔ ساتھ ہی مطالبہ کیا گیا کہ غزہ کے تمام زمینی راستے فوری طور پر کھولے جائیں تاکہ امداد بلا رکاوٹ پہنچ سکے۔

واضح رہے کہ 7 اکتوبر 2023 سے اسرائیل نے غزہ پر حملوں کے ساتھ ساتھ خوراک اور ادویات کی ترسیل روک کر قحط کی صورتحال پیدا کر دی ہے۔ 2 مارچ 2025 سے تمام زمینی راستے بند ہونے کے بعد انسانی بحران سنگین ترین سطح پر پہنچ چکا ہے۔

حماس کے رہنما باسم نعیم پہلے ہی فضائی امداد کی ترسیل روکنے کا مطالبہ کر چکے ہیں۔ ان کا کہنا تھا کہ یہ طریقہ نہ صرف خطرناک ہے بلکہ عوام کی بنیادی ضروریات بھی پوری نہیں کرتا، پھر بھی کچھ حلقے اس پر اصرار کر رہے ہیں۔