غزہ میں طبی بحران، اسرائیل کی رکاوٹ کی وجہ سے لیبارٹری خدمات درہم برہم

غزہ میں طبی بحران، اسرائیل کی رکاوٹ کی وجہ سے لیبارٹری خدمات درہم برہم

 فلسطین کی وزارتِ صحت نے غزہ میں شدید طبی بحران کی اطلاعات دیتے ہوئے کہا ہے کہ اسرائیل کی جانب سے طبی اور لیبارٹری سازوسامان کی آمد کو روکے جانے کے باعث زیادہ تر ضروری اشیاء کے ذخائر خطرناک حد تک کم ہو گئے ہیں۔ وزارتِ صحت نے بتایا کہ تقریباً ۸۴ فیصد لیبارٹری اشیاء میں شدید کمی واقع ہوئی ہے، جبکہ طبی استعمال کی دیگر ضروری اشیاء میں کمی ۷۱ فیصد تک پہنچ گئی ہے۔

اس صورتحال کے نتیجے میں اہم طبی تجربات، جیسے خون کے جُمنے کے عوامل، گیسز کے تجزیے، مائیکرو بائیولوجی، ٹیومر کی تشخیص، خون کی مطابقت کے ٹیسٹ اور سی بی سی (CBC) ٹیسٹ، تقریباً مکمل طور پر رکنے کے خطرے میں ہیں۔ وزارت نے خبردار کیا کہ اس بحران سے انتہائی نگہداشت، آپریشن تھیٹر، ایمرجنسی اور نوزائیدہ بچوں کے شعبوں میں خدمات فراہم کرنا تقریباً ناممکن ہو جائے گا۔

دو ہفتے قبل الشفاء اسپتال کے سربراہ ڈاکٹر محمد ابو سلیمہ نے بھی غزہ میں طبی خدمات کے فقدان اور دارو کی کمی کی سنگینی پر تشویش ظاہر کی تھی۔ ان کے مطابق، دو سال سے جاری شدید محاصرے اور طبی اشیاء کی آمد میں رکاوٹوں کی وجہ سے ۷۰ فیصد سے زائد اہم ادویات ختم ہو چکی ہیں، اور وبا اور موسمی وائرس کی وجہ سے مریضوں کی تعداد میں اضافہ ہو رہا ہے۔

ڈاکٹر ابو سلیمہ نے عالمی برادری پر زور دیا کہ وہ فوری دباؤ ڈالے تاکہ غزہ میں ادویات اور طبی سازوسامان کی رسائی ممکن بنائی جا سکے۔ انہوں نے خبردار کیا کہ اگر گذرگاہیں کھولنے میں تاخیر جاری رہی تو اس کے نتیجے میں بچوں اور بزرگوں سمیت مزید انسانی جانوں کا ضیاع ہو سکتا ہے۔

رپورٹ کے مطابق، غزہ میں طبی عملہ انتہائی مشکلات کے باوجود خدمات جاری رکھے ہوئے ہے، تاہم اب تک تقریباً ۱,۶۰۰ طبی کارکن شہید ہو چکے ہیں اور سیکڑوں کو گرفتار کیا جا چکا ہے۔ اس کے باوجود وہ انسانی ذمہ داری کے تحت اپنی خدمات جاری رکھے ہوئے ہیں۔