غزہ انتظامی کمیٹی امریکی استعماری شکنجے میں ’’امن کونسل‘‘ اصل رکاوٹ بن گئی

?️ 8 فروری 2026

غزہ انتظامی کمیٹی امریکی استعماری شکنجے میں،’’امن کونسل‘‘ اصل رکاوٹ بن گئی

امریکی صدر ڈونلڈ ٹرمپ کی زیر قیادت نام نہاد ’’امن کونسل‘‘ کے استعماری عزائم کے باعث غزہ کی انتظامی کمیٹی کو شدید چیلنجز کا سامنا ہے۔ اگرچہ اس کمیٹی کو ایک تکنوکریٹ اور قومی نوعیت کا ادارہ قرار دیا جا رہا ہے، تاہم زمینی حقائق یہ بتاتے ہیں کہ امریکہ اور اسرائیل اس کی سمت اور دائرۂ کار کو محدود کرنے کی کوشش کر رہے ہیں۔

عربی میڈیا رپورٹس کے مطابق واشنگٹن اور تل ابیب ایک ایسے فلسطینی ادارے کے خواہاں ہیں جو غزہ کے زمینی حالات سے واقف ہو اور عوام میں قبولیت بھی رکھتا ہو، مگر اسے کسی قسم کی قومی یا سیاسی نمائندگی حاصل نہ ہو۔ اس حکمتِ عملی کا مقصد حماس اور فلسطینی اتھارٹی کو الگ تھلگ کرتے ہوئے غزہ کو امریکی۔اسرائیلی نگرانی میں لانا ہے۔

تجزیہ کاروں کا کہنا ہے کہ ’’امن کونسل‘‘ دراصل ایک استعماری ڈھانچہ ہے جس کی قیادت ایسے عناصر کے ہاتھ میں ہے جو صہیونیت کی حمایت اور جنگی مفادات سے وابستہ رہے ہیں۔ اس تناظر میں غزہ انتظامی کمیٹی کے لیے ایک حقیقی قومی کردار ادا کرنا انتہائی مشکل بنا دیا گیا ہے۔

رپورٹس میں خبردار کیا گیا ہے کہ اگر یہ دباؤ برقرار رہا تو غزہ انتظامی کمیٹی محض اسرائیلی کنٹرول کو سہل بنانے والا ایک انتظامی ادارہ بن کر رہ جائے گی، جو فلسطینی قومی شناخت، اتحاد اور سیاسی نمائندگی کو مزید کمزور کر دے گا۔

ماہرین کے مطابق اس نازک مرحلے پر عرب اور اسلامی دنیا کی ذمہ داری ہے کہ وہ فلسطینی کاز کا بھرپور دفاع کرے، غزہ انتظامی کمیٹی کو تنہا نہ چھوڑے اور نام نہاد استعماری ’’امن منصوبوں‘‘ کے خلاف واضح اور متحد مؤقف اختیار کرے۔