صہیونی مجرمانہ دشمن کے ساتھ معمول کا کوئی جواز نہیں ہے: انصاراللہ

سچ خبریں:عبدالملک الحوثی، رہبر تحریک انصاراللہ یمن نے بعض عرب حکومتوں پر شدید تنقید کرتے ہوئے کہا ہے کہ صیہونی دشمن کے ساتھ تعلقات معمول پر لانے کی کوئی بھی وجہ قابلِ قبول نہیں ہو سکتی۔

 ان کا کہنا تھا کہ بعض نادان حکومتیں صیہونی تسلط کو ایک ناگزیر حقیقت قرار دے کر یہ سوچ رہی ہیں کہ عوام کو اسے قبول کرتے ہوئے خود کو اس کے مطابق ڈھال لینا چاہیے۔

الحوثی نے مزید کہا کہ یہ لوگ انتہائی نادان ہیں اور تاریخی حقائق اور عظیم تبدیلیوں سے بے خبر ہیں۔ ان کا نقطہ نظر سطحی ہے اور وہ وقت کی اہم حقیقتوں سے ناآشنا ہیں۔ انہوں نے واضح کیا کہ ایسی کوئی وجہ نہیں جو کسی وحشی اور مجرم دشمن کے سامنے سرِتسلیم خم کرنے، اس سے بیعت کرنے یا اس کے ساتھ تعلقات معمول پر لانے کو جائز قرار دے سکے۔

انصاراللہ کے رہبر نے زور دے کر کہا کہ اس امت پر تسلط اور ان معاشروں کی تباہی صیہونی دشمن کا مستقل عقیدہ ہے، جو دوسروں کو حیوان سمجھتا ہے۔ ایسے دشمن کے ساتھ تعلقات معمول پر لانے کی کوئی گنجائش نہیں۔