صہیونی حزب اللہ کے ڈرونز سے خوفزدہ 

سچ خبریں:ریزرو بریگیڈیئر جنرل زویکا ہیمووچ نے اسرائیل کے ریڈیو ایف ایم 103 سے گفتگو کرتے ہوئے حزب اللہ کے ایف پی وی خودکش ڈرونوں کے بڑھتے ہوئے خطرے سے متعلق خبردار کیا ہے۔ 

انہوں نے کہا کہ اس ہتھیار کے جلد ہی (مقبوضہ فلسطین کے) بڑے شہروں تک پہنچنے کا امکان بہت زیادہ ہے، جبکہ اسرائیل اس کا مقابلہ کرنے کے لیے کسی بھی طرح تیار نہیں ہے۔

صہیونی حکومت کے سابق اعلیٰ فوجی افسر، جنہوں نے صہیونی حکومت کے فضائی دفاع کی کمانڈ بھی کی ہے، نے اعتراف کیا کہ اگرچہ اسرائیلی فیصلہ سازی کے مراکز کے لیے ڈرون طیاروں کا خطرہ کافی عرصے سے واضح اور عیاں تھا، لیکن فوجی اداروں کی جانب سے اس کا مقابلہ کرنے کے لیے کوئی تیاری نہیں کی گئی۔ انہوں نے مزید کہا کہ آج ہم جو کچھ دیکھ رہے ہیں، یہ اس معاملے کا صرف آغاز ہے اور ہمیں اس کے بعد کے نتائج کا بھی انتظار کرنا چاہیے۔

ہیمووچ نے اعتراف کیا کہ آج ہم حزب اللہ کی طرف سے جو کچھ دیکھ رہے ہیں، وہ اس تنظیم کی جانب سے موجودہ خطرات ہیں، اور ہمیں مستقبل کے خطرات کا بھی انتظار کرنا چاہیے۔ انہوں نے کہا، ہمیں خود سے پوچھنا چاہیے کہ ہم اس حال اور صورتحال تک کیسے پہنچے، اور اس خطرے کے مقابلے میں ہم اتنے غیر تیار اور لاچار کیوں ہیں۔ ہم نے ایران (سے خوف) کو اپنی ترجیح اتنا بڑھا دیا کہ سب کچھ اس کے سائے میں آگیا۔