صومالی لینڈ کو تسلیم کرنا اسرائیل کے نئے مشرقِ وسطیٰ منصوبے کا حصہ ہے:یمنی نائب وزیر خارجہ

?️ 28 دسمبر 2025

صومالی لینڈ کو تسلیم کرنا اسرائیل کے نئے مشرقِ وسطیٰ منصوبے کا حصہ ہے:یمنی نائب وزیر خارجہ

صنعا میں قائم یمن کی حکومت کے نائب وزیر خارجہ نے خبردار کیا ہے کہ اسرائیل کی جانب سے صومالی لینڈ کو ایک خودمختار ملک کے طور پر تسلیم کرنا دراصل صہیونی منصوبے نیا مشرقِ وسطیٰ کا حصہ ہے، جس کا مقصد خطے میں تقسیم اور بیرونی مداخلت کو فروغ دینا ہے۔

المسیرہ ٹی وی نیٹ ورک کے حوالے سے عبدالواحد ابو رأس نے خبر رساں ایجنسی سبأ سے گفتگو کرتے ہوئے کہا کہ خطے میں اسرائیلی اثر و رسوخ ان خلاؤں اور اندرونی کمزوریوں کے نتیجے میں بڑھ رہا ہے جو بعض عرب حکومتوں کی وابستگی پر مبنی پالیسیوں کی وجہ سے پیدا ہوئے ہیں۔

انہوں نے کہا کہ امریکہ اس عمل میں اسرائیل کا شراکت دار ہے اور حالیہ بیانات و اقدامات دراصل واشنگٹن اور تل ابیب کے درمیان کرداروں کی تقسیم کی عکاسی کرتے ہیں تاکہ ان منصوبوں کو آگے بڑھایا جا سکے۔

یمنی نائب وزیر خارجہ نے بعض عرب ممالک کی جانب سے محض بیانات پر اکتفا کرنے پر شدید تنقید کرتے ہوئے کہا کہ یہ رویہ ذمہ داری سے فرار اور اسرائیلی منصوبوں کو آسان بنانے کے مترادف ہے۔

ابو رأس نے خبردار کیا کہ عرب دنیا اس شرمناک رویے کے باعث وسیع پیمانے پر غیر ملکی مداخلت اور علیحدگی پسند منصوبوں کے خطرے سے دوچار ہو رہی ہے، جس کے نتائج کی مکمل ذمہ داری انہی حکومتوں پر عائد ہوتی ہے۔

یہ بیان ایسے وقت میں سامنے آیا ہے جب اسرائیلی حکومت نے باضابطہ طور پر صومالی لینڈ کو ایک خودمختار سیاسی وجود کے طور پر تسلیم کرنے کا اعلان کیا۔ اسرائیلی وزیراعظم کے دفتر کے مطابق یہ اقدام نام نہاد ’’ابراہیمی معاہدوں‘‘ کے تناظر میں کیا گیا ہے۔

صومالی لینڈ، جو صومالیہ کے شمال میں واقع ایک خطہ ہے، طویل عرصے سے علیحدگی کی کوشش کر رہا ہے، جبکہ صومالیہ کی مرکزی حکومت اس اقدام کو اپنی خودمختاری اور علاقائی سالمیت کے خلاف قرار دے چکی ہے۔

مبصرین کے مطابق، اسرائیل اس طرح کے اقدامات کے ذریعے غزہ جنگ کے بعد بڑھتی ہوئی عالمی تنہائی سے نکلنے اور افریقہ کے اسٹریٹجک علاقوں میں اپنے جغرافیائی و سیاسی مفادات کو وسعت دینے کی کوشش کر رہا ہے۔