سپریم کورٹ کو غیرفعال کردیا گیا، جب جج کا تقرروتبادلہ ایگزیکٹو کرے گا تو وہ انصاف کیسے دے گا؟ اسد قیصر

?️ 19 نومبر 2025

اسلام آباد: (سچ خبریں) سابق سپیکر قومی اسمبلی اور تحریک انصاف کے راہنما اسد قیصر نے کہا ہے کہ سپریم کورٹ کو غیرفعال کردیا گیا، جب جج کا تقرروتبادلہ ایگزیکٹو کریگا تو وہ انصاف کیسے دے گا؟

اسد قیصر نے کہا کہ عدلیہ کو ایگزیکٹو کے ماتحت کرنے کا مشن 27 ویں ترمیم کے ذریعے مکمل کیا گیا. انہوں نے” ایکس“ پر اپنے ایک بیان میں کہا کہ 26 ویں آئینی ترمیم کے ذریعے عدلیہ کو ایگزیکٹو کے ماتحت کرنے کا جو مشن شروع کیا گیا تھا، اسے 27 ویں آئینی ترمیم کے ذریعے مکمل کیا گیا۔

سپریم کورٹ کو عملی طور پر غیر فعال کر دیا گیا ہے جب ایک جج کا تقرر یا تبادلہ ایگزیکٹو کرے گا تو وہ انصاف کیسے فراہم کر سکے گا موجودہ پارلیمان کے پاس عوامی مینڈیٹ نہیں ہے، اس لیے ہم ان ترمیمات کو تسلیم نہیں کرتے.

انہوں نے کہا کہ ہم تحریک تحفظ آئین پاکستان کے پلیٹ فارم سے ان ناجائز ترمیمات کے خلاف بھرپور عوامی مزاحمت کریں گے اور آج اس موقع پر یہ عہد کرتے ہیں کہ ہم 1973 کے متفقہ آئین کو اس کی اصل حالت میں بحال کریں گے، جو واحد معاہدہ ہے جس نے وفاق اور تمام اکائیوں کو متحد رکھا ہوا ہے.

اسد قیصر نے شاہ محمود قریشی کی جلد اور مکمل صحت یابی کےلئے دعا کی اور کہا کہ اللہ تعالی انہیں شفاے کاملہ و عاجلہ عطا فرمائے اور اپنی حفظ و امان میں رکھے شاہ محمود قریشی نے گزشتہ دو برس سے  بانی چیرمین عمران خان کے نظریے کے ساتھ وفاداری اور ثابت قدمی کے باعث بے گناہ قید کا سامنا کر رہے ہیں انہوں نے جس جواں مردی، صبر، استقلال اور حوصلے کے ساتھ اس آزمائش کو برداشت کیا ہے، وہ اپنے اندر ایک مثال رکھتا ہے میں ان کی ثابت قدمی کو سلام پیش کرتا ہوں.