صنعا کے رہائشی علاقوں پر سعودی اتحاد کے فضائی حملے

?️ 23 دسمبر 2021

سچ خبریں:آج صبح سعودی اتحاد نے یمن کے دارالحکومت صنعا میں رہائشی علاقوں پر دوبارہ فضائی حملے کیے ہیں۔
روئٹرز خبر رساں ادارےکی رپورٹ کے مطابق سعودی حکومت نے یمن کے نہتے عوام کے خلاف بربریت کی ایک نئی لہر میں صنعا کے رہائشی علاقوں پر بمباری شروع کردی، سعودی اتحاد نے فضائی حملے کے بعد ایک بیان میں کہاکہ صنعا پر یہ میزائل حملہ جیزان کے علاقے میں ایک ڈرون کو تباہ کرنے کی کارروائی کا فوری ردعمل تھا۔

سعودی اتحاد نے ایک رپورٹ میں دعویٰ کیا ہے کہ اس نے آج صبح ایک فضائی حملے میں یمنی عوامی مزاحمتی فورسز کے اسلحے کے ذخیرے اور متعدد ڈرونز کو تباہ کر دیا ہے جبکہ یہ حملے رہائشی علاقوں میں کیے گئے جس کا مقصد لوگوں کو ڈرانا ہے، یمنی انصار اللہ گروپ نے اس ہفتے کے شروع میں اعلان کیا تھا کہ اس نے الجوف صوبے اور سعودی عرب کے ساتھ ملحقہ جنوبی سرحد میں معزول یمنی صدر منصور ہادی کے خلاف اس تنظیم کی فورسز کی لڑائی میں اہم پیش رفت کی ہے۔

درایں اثنا یمن کے ایک فوجی عہدہ دار نے اسپوٹنک کو دیے گئے انٹرویو میں کہا کہ انصار اللہ گروپ صوبہ الجوف اور آس پاس کی تمام پہاڑیوں پر بڑے پیمانے پر حملے کے بعد الیتمہ کے علاقے کے اسٹریٹیجک علاقوں اور خب الشعف شہر کے مرکز سمیت ایک بڑے حصے پر کنٹرول حاصل کرنے میں کامیاب ہو گیا ہے۔