شام میں تمہارا کھیل ختم ہوچکا،اب یہاں سے جانا ہوگا؛ایرانی سفیر کا امریکہ کو پیغام

?️ 2 جنوری 2022

سچ خبریں:شام میں ایرانی سفیر نے کہا کہ تہران شام پر کسی بھی ملک یا طاقت کے قبضے کی شدید مذمت کرتا ہے اور امریکی افواج کو شام سے نکل جانا چاہیے۔

شام میں ایران کے سفیر مہدی سبحانی نے العہد ویب سائٹ کو انٹرویو دیتے ہوئے دمشق اور تہران کے درمیان اقتصادی تعلقات کے بارے میں بات کی جس میں شام میں سلامتی کی صورتحال کے بارے میں موجودہ ذہنیت کو تبدیل کرنے نیز تمام دہشت گردوں اور قابض افواج کی غیر قانونی موجودگی کو مسترد کرنے کی اہمیت پر زور دیا۔

انہوں نے کہا کہ ایران اور شام کے درمیان اقتصادی اور تجارتی تعاون نیز شام کی تعمیر نو میں ایران کی شرکت اہم ہے ،اگر چہ دونوں ممالک نازک مرحلے میں ہیں اور اقتصادی جنگ اور بہت سی پابندیوں سے نبرد آزما ہیں تاہم پھر بھی ہمیں اقتصادی اور تجارتی پہلوؤں پر توجہ مرکوز کرنا چاہیے۔

ایرانی سفیر نے مزید کہا کہ ایران شام پر کسی بھی ملک یا طاقت کے قبضے کی شدید مذمت کرتا ہے، خواہ وہ گولان کی پہاڑیوں پر ہو، شام کے شمال مغرب میں ہو یا شمال مشرق میں،شام میں امریکی افواج کی موجودگی کے بارے میں سبحانی نے کہاکہ یہ افواج شام کی سرزمین چھوڑنے پر مجبور ہوں گی، ہم اس کے لیے کوئی وقت نہیں بتا سکتے، لیکن یہ ہوگا اور ہونا چاہیے۔

آخر میں انہوں نے تاکید کی کہ شام کے دشمنوں کو یہ سمجھ لینا چاہیے کہ شام کے حوالے سے ان کی پالیسی ناکام ہو چکی ہے اور انھوں نے خطے کی اقوام کو نقصان کے سوا کچھ نہیں دیا ہے۔