سعودی عرب کے وحشیانہ حملوں میں یمنی بچے زندہ دفن

?️ 25 دسمبر 2021

سچ خبریں:یمنی عوام کے خلاف سعودی امریکی جارحیت کے ریکارڈ میں ایک نیا قتل عام شامل ہو گیا۔
سعودی امریکی جارح اتحاد کی جانب سے یمن کی غاروں اور بیلسٹک میزائل ڈپو پر فوجی آپریشن اور فضائی حملے شروع کرنے کے اعلان کے بعد یہ بات واضح ہو گئی کہ ان حملوں میں کئی عمارتوں اور رہائشی مکانات کو نشانہ بنایا گیا جن میں سے ایک ٹیلی کمیونیکیشن کمپنی کی عمارت بھی تھی۔

واضح رہے کہ یمن کے شمال میں واقع الموحیت شہر میں سعودی حملوں نے متعددعمارتوں کو تباہ کر دیا اور ان کے متعدد مکینوں کو شہید اور زخمی کر دیا جن میں دو بچے اور ایک خاتون بھی شامل ہے، مقامی ذرائع نے بتایا کہ جنگی طیاروں نے صوبائی ٹیلی کمیونیکیشن کنسٹرکشن ڈیپارٹمنٹ کے گارڈ روم کو نشانہ بنایا، حملے کی وجہ سے گارڈ کا کمرہ زمین بوس ہو گیا اور عمارت کا گارڈ بیوی بچوں سمیت شہید ہو گیا جب کہ قریبی عمارتوں اور مکانات کو شدید نقصان پہنچا۔

اس کے علاوہ سعودی لڑاکا طیاروں نے صعدہ، حجہ اور مأرب صوبوں کے خلاف درجنوں حملے کیے، جس میں بڑے پیمانے پر کھیتوں اور شہری علاقوں کو تباہ کیا گیا اور صوبے کی سڑکوں اور پلوں کو بڑے پیمانے پر نقصان پہنچا۔

یادرہے کہ سعودی فضائی حملوں نے صنعا میں بغداد اور الزبیری سڑکوں پر واقع کئی تعلیمی اداروں کو تباہ کر دیا،بار بار ہونے والے حملوں نے اساتذہ، تعلیمی امداد کے لیے فنڈ کی عمارت، تعلیمی آلات کے مرکز اور بغداد اسکول کو وسیع نقصان پہنچایا۔