سعودی عرب اور امارات کا مصر میں 18.5 ارب ڈالر کا سیاحتی منصوبہ

سعودی عرب اور امارات کا مصر میں 18.5 ارب ڈالر کا سیاحتی منصوبہ

مصر نے بحیرۂ احمر کے ساحل پر ایک بڑے سیاحتی منصوبے کے آغاز کا اعلان کیا ہے جس میں سعودی عرب اور متحدہ عرب امارات کی بڑی کمپنیوں کی شراکت سے 18.5 ارب ڈالر کی سرمایہ کاری کی جا رہی ہے۔

روزنامہ الشرق الاوسط کے مطابق، یہ منصوبہ 10 ملین مربع میٹر رقبے پر تعمیر کیا جائے گا اور اس میں اماراتی کمپنی اعمار اور سعودی کمپنی سِٹی اسٹارز سرمایہ کاری کریں گی۔

اعمار کے چیئرمین جمال بن سنیہ نے بتایا کہ منصوبے پر تقریباً 900 ارب مصری پاؤنڈ (یعنی 18.5 ارب ڈالر) لاگت آئے گی اور اس سے تعمیراتی مرحلے کے دوران 1.5 سے 1.7 لاکھ عارضی ملازمتیں پیدا ہوں گی جبکہ منصوبہ مکمل ہونے کے بعد تقریباً 25 ہزار مستقل روزگار کے مواقع میسر آئیں گے۔سعودی کمپنی سِٹی اسٹارز کے نائب چیئرمین حسن شربتلی نے کہا کہ یہ منصوبہ ڈیزائن اور سہولیات کے اعتبار سے منفرد ہوگا۔

مصری وزیراعظم مصطفی مدبولی نے تقریب سے خطاب کرتے ہوئے کہا کہ حکومت سیاحت اور عمرانی ترقی کو اولین ترجیح دے رہی ہے۔ انہوں نے بتایا کہ منصوبے کے پہلے مرحلے میں ایک بین الاقوامی میرینا (Marina) تعمیر کی جائے گی جو تفریحی کشتیوں کے لیے سہولیات فراہم کرے گی اور مصر کی معیشت میں نمایاں اضافہ کرے گی۔

مدبولی نے مزید کہا کہ اس منصوبے میں مصری حکومت کے لیے مخصوص تعمیراتی حصے بھی مختص کیے گئے ہیں تاکہ ریاست بھی براہِ راست اس کے فوائد حاصل کر سکے۔